തിരുവനന്തപുരം: തിരുവനന്തപുരം നാഥനില്ലാ കളരിയായി മാറിയിരിക്കുകയാണെന്ന് പ്രതിപക്ഷ നേതാവ് വി ഡി സതീശൻ. സര്‍ക്കാര്‍ കേരളത്തെ മുടിഞ്ഞ തറവാടാക്കി മാറ്റുകയാണെന്നും അദ്ദേഹം ആരോപിച്ചു. കൂടാതെ കേന്ദ്രത്തിന്‍റെ സാമ്പത്തിക നയത്തോട് കോണ്‍ഗ്രസിന് വിയോജിപ്പുണ്ട്. അതുകൊണ്ടാണ് ടിഎന്‍ പ്രതാപന്‍ അടിയന്തര പ്രമേയത്തിന് നോട്ടീസ് നല്‍കിയതെന്നും പ്രതിപക്ഷ നേതാവ് പറഞ്ഞു.
സാമ്പത്തിക പ്രതിസന്ധിയുടെ ഒരു കാരണം മാത്രമാണ് കേന്ദ്ര നിലപാട്. കേന്ദ്ര നിലപാട് ചെറിയ ഒരു അംശം മാത്രമാണ്. പ്രധാന പ്രശ്‍നം കേരളത്തിന്റെ കെടുകാര്യസ്ഥതയാണ്. സെക്രട്ടറിയേറ്റിൽ ആഴ്ചയിൽ അഞ്ച് ദിവസം എങ്കിലും ധനമന്ത്രി ഉണ്ടാവേണ്ടതാണ്. എന്നാൽ ദിവസങ്ങളായി ധനമന്ത്രി സ്ഥലത്ത് ഇല്ല. ധനമന്ത്രിയോട് എങ്കിലും സെക്രട്ടേറിയേറ്റിൽ വന്നിരിക്കാൻ മുഖ്യമന്ത്രി പറയണമെന്നും വിഡി സതീശന്‍ പറഞ്ഞു.
Share This Post
