കൊച്ചി: ടൊവിനോ തോമസ് നായകനായ എആര്‍എം (അജയന്റെ രണ്ടാം മോഷണം) എന്ന ചിത്രത്തിന്റെ വ്യാജ പതിപ്പ് പുറത്തിറങ്ങിയതായി സംവിധായകന്‍. നവാഗതനായ ജിതിന്‍ ലാലാണ് ചിത്രം സംവിധാനം ചെയ്തത്. സംവിധായകന്‍ ജിതിന്‍ ലാല്‍ തന്നെയാണ് സോഷ്യല്‍ മീഡിയയിലൂടെ പങ്കുവച്ചത്.
ട്രെയിന്‍ യാത്രയ്ക്കിടെ ഒരാള്‍ ചിത്രം മൊബൈല്‍ ഫോണില്‍ കാണുന്ന ദൃശ്യവും അദ്ദേഹം പങ്കുവച്ചു. ഒരു സുഹൃത്താണ് ഇത് എനിക്ക് അയച്ചുതന്നതെന്നും ഹൃദയഭേദകമാണെന്നും അദ്ദേഹം കുറിപ്പിൽ പറയുന്നു. സംഭവത്തിൽ പരാതി നൽകുമെന്ന് നിർമാതാവ് ലിസ്റ്റിൻ സ്റ്റീഫൻ അറിയിച്ചു.
ഒരു സംവിധായകന്റെ എട്ട് വർഷത്തെ സ്വപ്നമാണ് ഈ സിനിമയെന്നും വലിയ മുതൽമുടക്കിൽ വർഷങ്ങളെടുത്ത് ഒരുക്കിയതാണ് ഈ ചിത്രമെന്നും ലിസ്റ്റിൻ സ്റ്റീഫൻ പറഞ്ഞു. ഈ മാസം പന്ത്രണ്ടാം തിയ്യതിയാണ് അജയന്റെ രണ്ടാം മോഷണം റിലീസ് ചെയ്തത്.
Share This Post
