തിരുവനന്തപുരം: വർക്കല ജില്ലാ ആയുർവേദ ആശുപത്രിയിൽ ഹെൽത്തി ഫുഡ് എക്സ്പോ സംഘടിപ്പിച്ചു. ആരോഗ്യം ആനന്ദം -വൈബ് ഫോർ വെൽനെസ്സ് ക്യാമ്പയിന്റെ ഭാഗമായിട്ടാണ് പരിപാടി സംഘടിപ്പിച്ചത്. ജീവനക്കാർതന്നെ തയ്യാറാക്കി കൊണ്ടുവന്ന ആരോഗ്യകരമായ ഭക്ഷണപദാർത്ഥങ്ങളുടെ പ്രദർശനമാണ് നടന്നത്.
ഫുഡ് എക്സ്പോ ചീഫ് മെഡിക്കൽ ഓഫീസർ ഡോ.ഷർമദ് ഖാൻ ഉദ്ഘാടനം ചെയ്തു. ജീവിതശൈലി രോഗങ്ങൾ ക്രമാതീതമായി വർദ്ധിച്ചുവരുന്ന ഈ കാലഘട്ടത്തിൽ ആരോഗ്യകരമായ ഭക്ഷണം, മതിയായ വ്യായാമം, കൃത്യമായ ഉറക്കം, ആരോഗ്യ പരിപാലനം എന്നീ സുപ്രധാന കാര്യങ്ങൾ ശ്രദ്ധിക്കേണ്ടതുണ്ട്. ഇവയിൽ ഏറ്റവും അധികം പ്രശ്നങ്ങൾ സൃഷ്ടിക്കുന്നത് ഇന്നത്തെ തെറ്റായ ആഹാര ശീലങ്ങളാണ്. അതിനാൽ തന്നെ ഉപ്പ്, പഞ്ചസാര, എണ്ണ എന്നിവയുടെ ഉപയോഗം ഏറ്റവും പരിമിതപ്പെടുത്തിയുള്ള ആഹാരമാണ് ശീലിക്കേണ്ടത്.
പ്രമേഹരോഗ നിയന്ത്രണത്തിനും അമിതവണ്ണം കുറയ്ക്കുന്നതിനും ചെറു ധാന്യങ്ങൾ കൊണ്ടുള്ള മൾട്ടി മില്ലറ്റ് ഇഡലി, റാഗി ബീറ്റ്റൂട്ട് പുട്ട്, മുരിങ്ങയില തോരൻ, ബീറ്റ്റൂട്ട് ദോശ, നെല്ലിക്ക പുളിശ്ശേരി, എള്ളുണ്ട, ചെമ്പരത്തി ചായ, പപ്പായ എരിശ്ശേരി, കായ തോരൻ, മുക്കുറ്റി അരിമാവ് കുറുക്ക്, വയനയില അപ്പം, ചങ്ങലംപരണ്ട ചമ്മന്തി, ശാരിബാ (നറുനണ്ടി ) പാനകം, വിവിധതരം സാലഡുകൾ എന്നിങ്ങനെയുള്ള വിഭവങ്ങളുടെ പ്രദർശനവും ഇവയുടെ റെസിപ്പീസ്, തയ്യാറാക്കൽ ഇവ സംബന്ധിച്ച ക്ലാസും നടത്തി.
