ഇംഫാല്: മണിപ്പൂരില് പുതിയ ബിജെപി സര്ക്കാര് സത്യപ്രതിജ്ഞ ചെയ്ത് അധികാരമേറ്റു. ബിജെപി നേതാവ് വൈ. ഖേംചന്ദ് സിംഗ് മുഖ്യമന്ത്രിയായി സത്യപ്രതിജ്ഞ ചെയ്തു. രണ്ട് ഉപമുഖ്യമന്ത്രിമാരും മറ്റു മന്ത്രിമാരും ഇംഫാലിലെ ലോക്ഭവനില് നടന്ന ചടങ്ങില് സത്യപ്രതിജ്ഞ ചെയ്ത് അധികാരമേറ്റു. ഒരുവര്ഷത്തോളം നീണ്ട രാഷ്ട്രപതി ഭരണം ബുധനാഴ്ച പിന്വലിച്ചതിനു പിന്നാലെയാണ് പുതിയ ബിജെപി സര്ക്കാര് അധികാരമേറ്റത്. വംശീയ കലാപങ്ങളെത്തുടര്ന്ന് മുഖ്യമന്ത്രി രാജിവച്ചതിനെ തുടര്ന്ന് 2025 ഫെബ്രുവരി 13നാണ് മണിപ്പൂരില് രാഷ്ട്രപതി ഭരണം ഏര്പ്പെടുത്തിയത്.
ബിജെപിയുടെ നെംചാ കിപ്ജെന്, നാഗാ പീപ്പിള്സ് ഫ്രണ്ടിന്റെ ലോസി ദിഖോ എന്നിവരാണ് പുതിയ ഉപമുഖ്യമന്ത്രിമാര്. കുക്കി വിഭാഗത്തില് നിന്ന് ആദ്യമായി ഉപമുഖ്യമന്ത്രിയാകുന്ന ആളാണ് നെംചാ. ബിജെപിയുടെ ഗോവിന്ദാസ് കൊന്തൗജം, നാഷണല് പീപ്പിള്സ് പാര്ട്ടിയുടെ ഖേ ലോകേന് എന്നിവര് മന്ത്രിമാരായും സത്യപ്രതിജ്ഞ ചെയ്തു. സത്യപ്രതിജ്ഞാ ചടങ്ങില് ബിജെപി എംഎല്എമാരും സംസ്ഥാനത്തെ മുതിര്ന്ന പാര്ട്ടി ഭാരവാഹികളും എന്ഡിഎ നേതാക്കളും പങ്കെടുത്തു.
മണിപ്പൂരിന്റെ മുന് മുഖ്യമന്ത്രി എന്.ബീരേന്സിംഗ് വംശീയ കലാപങ്ങളെത്തുടര്ന്ന് 2025 ഫെബ്രുവരി 9-നാണ് രാജിവച്ചത്. ഇതിനുപിന്നാലെ 2025 ഫെബ്രുവരി 13-ന് രാഷ്ട്രപതി ഭരണം ഏര്പ്പെടുത്തി. രാഷ്ട്രപതി ഭരണം ഏര്പ്പെടുത്തിയെങ്കിലും നിയമസഭ പിരിച്ചുവിട്ടിരുന്നില്ല.
