തിരുവനന്തപുരം: കാൻസർ എന്ന മാരക രോഗത്തിന്റെ പിടിയിലകപ്പെട്ട് ജീവിതം വഴിമുട്ടിയ പാവപ്പെട്ട രോഗികൾക്കും അവരുടെ കുടുംബങ്ങൾക്കും പ്രത്യാശയുടെ തണലേകാൻ തിരുവനന്തപുരം സി.എച്ച് സെന്റർ നടത്തുന്ന റമദാൻ ഫണ്ട് സമാഹരണത്തിന്റെ ഭാഗമായുള്ള ബക്കറ്റ് കളക്ഷൻ നാളെ (ഫെബ്രുവരി 27, വെള്ളി) നടക്കും. ജില്ലയിലെ പള്ളികൾ, പ്രധാന കവലകൾ എന്നിവ കേന്ദ്രീകരിച്ച് നടത്തുന്ന ഈ ഫണ്ട് ശേഖരണത്തിലൂടെ സമാഹരിക്കുന്ന തുക കാൻസർ ബാധിതരുടെ ചികിത്സയ്ക്കും മറ്റു ജീവകാരുണ്യ പ്രവർത്തനങ്ങൾക്കുമായാണ് വിനിയോഗിക്കുന്നത്.
ശാരീരിക വേദനയേക്കാൾ ഉപരിയായി ചികിത്സാ ചെലവുകൾക്ക് മുന്നിൽ പകച്ചുനിൽക്കുന്ന ആയിരക്കണക്കിന് രോഗികളാണ് പ്രതിദിനം സി.എച്ച് സെന്ററിന്റെ സഹായം തേടിയെത്തുന്നത്. ആർ.സി.സിയിൽ എത്തുന്ന നിർധനരായ രോഗികൾക്ക് മരുന്നും ഭക്ഷണവും താമസസൗകര്യവും നൽകുന്ന ഈ സ്ഥാപനം, നിലവിലെ രോഗികളുടെ ബാഹുല്യം കാരണം വലിയൊരു വിപുലീകരണത്തിന്റെ പാതയിലാണ്. കഴിഞ്ഞ വർഷം തുടക്കം കുറിച്ച 20,000 സ്ക്വയർ ഫീറ്റ് കെട്ടിടത്തിന്റെ നിർമ്മാണം ഇപ്പോൾ അവസാന ഘട്ടത്തിലാണ്. ഈ കെട്ടിടം പൂർത്തിയാകുന്നതോടെ കൂടുതൽ പേർക്ക് ആശ്വാസമെത്തിക്കാൻ സാധിക്കുമെന്നതാണ് സംഘാടകരുടെ പ്രതീക്ഷ.
മുതിർന്നവർക്ക് പുറമെ, കുരുന്നുപ്രായത്തിൽ തന്നെ കാൻസറിന്റെ ക്രൂരത അനുഭവിക്കുന്ന കുഞ്ഞുങ്ങൾക്കായി ആർ.സി.സിക്ക് സമീപം പ്രത്യേക പദ്ധതിയും സി.എച്ച് സെന്റർ വിഭാവനം ചെയ്യുന്നുണ്ട്. സൗജന്യമായി ലഭിച്ച പത്ത് സെന്റ് സ്ഥലത്ത് കാൻസർ ബാധിച്ച കുട്ടികൾക്കായുള്ള ഈ സവിശേഷ സംരംഭത്തിന് തുടക്കം കുറിക്കാനാണ് ഈ പവിത്രമായ റമദാൻ മാസത്തിൽ ഫണ്ട് ശേഖരണം നടത്തുന്നത്. പാണക്കാട് സയ്യിദ് സാദിഖലി ശിഹാബ് തങ്ങൾ ലോഞ്ച് ചെയ്ത മൊബൈൽ ആപ്പ് വഴിയും സഹായങ്ങൾ സ്വീകരിച്ചു വരുന്നു.
ഇ.ടി മുഹമ്മദ് ബഷീർ എം.പി പ്രസിഡന്റായ കമ്മിറ്റിയാണ് ഈ മഹത്തായ കാരുണ്യ പ്രസ്ഥാനത്തിന് നേതൃത്വം നൽകുന്നത്. പള്ളികളിലും കവലകളിലും സജീവമായ ഒരുക്കങ്ങളാണ് ബക്കറ്റ് കളക്ഷന് വേണ്ടി സംഘാടക സമിതി ജില്ലയിൽ നടത്തിയിട്ടുള്ളത്. വിധി തളർത്തിയ രോഗബാധിതർക്ക് താങ്ങായി നിൽക്കാൻ ജാതി-മത ഭേദമന്യേ എല്ലാവരും തങ്ങളാൽ കഴിയുന്ന സഹായങ്ങൾ നൽകി ഈ ഉദ്യമത്തിൽ പങ്കാളികളാകണമെന്ന് സംഘാടക സമിതി പ്രസ്താവനയിലൂടെ അഭ്യർത്ഥിച്ചു.
