പള്ളിത്തുറ വേളാങ്കണ്ണി മാതാവിന്റെ തിരുനാൾ: അവലോകന യോഗം ചേർന്നു; ആഗസ്റ്റ് 30-ന് കൊടിയേറും
കഴക്കൂട്ടംം: പള്ളിത്തുറ വിശുദ്ധ മേരി മഗ്ദലേന ദൈവാലയത്തിൽ ആഗസ്റ്റ് 30 മുതൽ സെപ്റ്റംബർ 9 വരെ നടക്കുന്ന പരിശുദ്ധ വേളാങ്കണ്ണി ആരോഗ്യ മാതാവിന്റെ വാർഷിക തിരുനാൾ ആഘോഷങ്ങളുടെ മുന്നോടിയായി അവലോകന യോഗം ചേർന്നു. പള്ളിത്തുറ ലയോള ഹാളിൽ നടന്ന യോഗത്തിൽ കഴക്കൂട്ടം എം.എൽ.എ വി. മുരളീധരൻ അധ്യക്ഷത വഹിച്ചു. തിരുനാൾ ആഘോഷ പരിപാടികളെക്കുറിച്ചും മുന്നൊരുക്കങ്ങളെക്കുറിച്ചും ഇടവക വികാരി ഫാദർ ജോസഫ് പ്രസാദ്, പള്ളിത്തുറ വാർഡ് കൗൺസിലർ D. സുചിത്ര യോഗത്തിൽ വിശദീകരിച്ചു. ആഗസ്റ്റ് 30-നാണ് ആഘോഷങ്ങൾക്ക് തുടക്കം കുറിച്ചുകൊണ്ട് കൊടിയേറുന്നത്. സെപ്റ്റംബർ 8-നാണ് പ്രധാന തിരുനാൾ ദിനം. സെപ്റ്റംബർ 9-ന് കൊടിയിറങ്ങുന്നതോടെ ആഘോഷങ്ങൾ സമാപിക്കും. തിരുനാളിനോടനുബന്ധിച്ച് ഭക്തജനങ്ങൾക്കായി മികച്ച സൗകര്യങ്ങൾ ഒരുക്കുന്നതും സുരക്ഷാ ക്രമീകരണങ്ങളും യോഗത്തിൽ വിശദമായി ചർച്ച ചെയ്തു. പോലീസ്, കോസ്റ്റ് ഗാർഡ്, കെ.എസ്.ഇ.ബി, ആരോഗ്യ വിഭാഗം, വാട്ടർ അതോറിറ്റി, പി.ഡബ്ല്യു.ഡി, കെ.എസ്.ആർ.ടി.സി തുടങ്ങിയ വിവിധ വകുപ്പുകളിലെ ഉദ്യോഗസ്ഥരും നഗരസഭാ കൗൺസിലർമാരും യോഗത്തിൽ പങ്കെടുത്ത് സഹകരണം ഉറപ്പുനൽകി. പാരിഷ് കൗൺസിൽ അംഗങ്ങൾ, തിരുനാൾ കമ്മിറ്റി ഭാരവാഹികൾ, പ്രദേശത്തെ സാമൂഹിക പ്രവർത്തകർ തുടങ്ങിയവരും യോഗത്തിൽ സംബന്ധിച്ചു.
