ഭോപ്പാൽ: മധ്യപ്രദേശിൽ മന്ത്രവാദത്തിന് ഇരയായ മൂന്ന് മാസം പ്രായമുള്ള കുഞ്ഞ് മരിച്ചു. ന്യുമോണിയ ബാധിതയായ കുഞ്ഞിന്‍റെ അസുഖം മാറാനായി മന്ത്രവാദത്തിനിരയാക്കിയെന്നാണ് റിപ്പോർട്ട്‌. ചികിത്സയെന്ന പേരിൽ പഴുപ്പിച്ച ലോഹദണ്ഡ് ഉപയോഗിച്ച് കുഞ്ഞിന്‍റെ വയറ്റില്‍ 51 തവണ കുത്തുകയായിരുന്നു. സംഭവം നടന്നത് മധ്യപ്രദേശിലെ ഗോത്രമേഖലയായ ഷാഡോളിലാണ്.
ഗുരുതരാവസ്ഥയിലായ കുഞ്ഞ് ഷാഡോള്‍ മെഡിക്കല്‍ കോളെജില്‍ ചികിത്സയിലിരിക്കെ മരിക്കുകയായിരുന്നു. കുട്ടിയെ 15 ദിവസം മുൻപാണ് മന്ത്രവാദത്തിന്‍റെ മറവിൽ ക്രൂരമായി മർദ്ദിച്ചത്. സംസ്‌കരിച്ച കുഞ്ഞിന്‍റെ മൃതദേഹം പുറത്തെടുത്ത് ഇന്ന് പോസ്റ്റ്‌മോര്‍ട്ടം നടത്തും.
ആശുപത്രിയിൽ വനിത ബാല ക്ഷേമ ഉദ്യോഗസ്ഥര്‍ എത്തിയപ്പോഴാണ് സംഭവം പുറത്തറിയുന്നത്. സംഭവത്തില്‍ അന്വേഷണം ആരംഭിച്ചെന്നും മന്ത്രവാദം നടത്തിയ സ്ത്രീക്കെതിരെ കേസ് രജിസ്റ്റര്‍ ചെയ്യുമെന്നും കളക്ടര്‍ പറഞ്ഞു.
