തിരുവനന്തപുരം : പ്രതിപക്ഷത്തിനെതിരെ രൂക്ഷ വിമർശനവുമായി പൊതു മരാമത്ത് വകുപ്പ് മന്ത്രി മുഹമ്മദ് റിയാസ് രംഗത്ത്. പ്രതിപക്ഷ നേതാവിന് ഹുങ്കാണെന്നും സ്പീക്കർക്കുമേൽ കുതിര കയറുകയാണ് പ്രതിപക്ഷമെന്നും മന്ത്രി പറഞ്ഞു. പ്രതിപക്ഷം സമവായത്തിന് വഴങ്ങുന്നില്ല. പ്രതിപക്ഷമാണ് നിയമസഭയിലെ ബഹളത്തിൽ ചിന്തിക്കേണ്ടതെന്നും റിയാസ് പറഞ്ഞു. അവർ വ്യക്തിപരമായ ആക്ഷേപമാണ് നടത്തുന്നത്. വ്യക്തിപരമായ ആരോപണം ഉന്നയിച്ചാൽ പേടിച്ച് പിൻമാറുന്നവരല്ല ഞങ്ങൾ. രാഷ്ട്രീയത്തെ രാഷ്ട്രീയമായി നേരിടുകയാണ് വേണ്ടതെന്നും റിയാസ് പറഞ്ഞു. സ്പീക്കറുടെ സഞ്ചാരസ്വാതന്ത്രം നിഷേധിച്ചത് ചരിത്രത്തിൽ ആദ്യമായാണെന്നും റിയാസ് പ്രതികരിച്ചു.
കൂടാതെ മാനേജ്മെൻറ് കോട്ട എന്ന പ്രതിപക്ഷത്തിന്റെ ആരോപണത്തിനും റിയാസ് മറുപടി നൽകി. ഇതിലും വലിയ ആരോപണങ്ങൾ ബേപ്പൂരിൽ മത്സരിച്ചപ്പോൾ കേട്ടിരുന്നു. ഇത്തരം പരാമർശങ്ങൾക്ക് മറുപടി പറയാനില്ല. ചരിത്രത്തിലെ വലിയ ഭൂരിപക്ഷം നൽകി ജനങ്ങൾ മറുപടി പറഞ്ഞതാണെന്നും റിയാസ് തിരിച്ചടിച്ചു.
