തിരുവനന്തപുരം: നടൻ അലൻസിയറിനെതിരേ സ്വമേധയാ കേസെടുത്ത് വനിതാ കമ്മിഷൻ. മാധ്യമപ്രവർത്തകയോട് അപമര്യാദയായി പെരുമാറിയ സംഭവത്തിലാണ് കേസ്. സംഭവവുമായി ബന്ധപ്പെട്ട് തിരുവനന്തപുരം റൂറൽ എസ്പി ഡി. ശിൽപയോട് റിപ്പോർട്ട് ആവശ്യപ്പെട്ടു. വനിത കമ്മീഷൻ അധ്യക്ഷ പി. സതീദേവിയാണ് ഇക്കാര്യം വ്യക്തമാക്കിയത്.
മാത്രമല്ല സംസ്ഥാന ചലച്ചിത്ര അവാർഡ് വിതരണ ചടങ്ങിനിടെ അലൻലസിയർ നടത്തിയ പരാമർശവും അങ്ങേയറ്റം അപലപനീയമാണെന്നും സതീദേവി പറഞ്ഞു. വിയോജിപ്പുണ്ടെങ്കില്‍ അവാര്‍ഡ് അദ്ദേഹം സ്വീകരിക്കരുതായിരുന്നു. അവാര്‍ഡ് സ്വീകരിച്ച ശേഷം ഇത്തരത്തിലുള്ള പ്രതികരണം ഉചിതമായില്ലെന്നും പിന്നീട് പറ്റിയത് അബദ്ധമെന്ന് പറഞ്ഞ് തെറ്റ് തിരുത്തുമെന്നാണ് കരുതിയത് എന്നാൽ അതും ഉണ്ടായില്ലെന്നും സതീദേവി വ്യക്തമാക്കി.
ഇതിനുശേഷം അഭിമുഖം നടത്തിയ അവതാരകയോട് തികച്ചും മ്ലേച്ഛമായ പദപ്രയോഗങ്ങളിലൂടെയാണ് അലൻസിയർ സംസാരിച്ചത്. ഇതിനെതിരേ ചാനൽ പ്രവർത്തക നൽകിയ പരാതിയിൽ അലൻസിയറിനെതിരേ തിരുവനന്തപുരം റൂറൽ എസ്പി കേസ് രജിസ്റ്റർ ചെയ്തിട്ടുണ്ട്.
