തിരുവനന്തപുരം: തലസ്ഥാന നഗരിയെ ഞെട്ടിച്ച 23 കാരനറെ കൊലപാതകത്തിൽ കൂടുതൽ വിവരങ്ങൾ പുറത്ത്. സംഭവത്തിൽ പ്രതികളെ പോലീസ് തിരിച്ചറിഞ്ഞു. അഖിൽ, വിനീത്, സുമേഷ് എന്നിവരാണ് കരമനയിലെ 23 കാരനായ അഖിലിന്റെ കൊലപാതകത്തിന് കാരണക്കാർ. ഇവർക്കായി തിരച്ചിൽ ഊര്ജിതമാക്കിയിരിക്കുകയാണ് പോലീസ്.
ഇന്നലെയാണ് കരമന സ്വദേശി അഖിലിനെ കാറിലെത്തിയ സംഘം ആക്രമിച്ച് കൊലപ്പെടുത്തിയത്. അതിക്രൂരമായിട്ടാണ് ഇവർ കൃത്യം നടത്തിയത്. സംഭവത്തിന്റെ സി സി ടി വി ദൃശ്യങ്ങൾ പുറത്തുവന്നു. അഖിലിനെ ആദ്യം കയ്യിൽ കരുതിയിരുന്ന മാരകായുധം കൊണ്ട് വെട്ടി വീഴ്ത്തിയ ശേഷം കൊലയാളി സംഘം ദേഹത്ത് കല്ലെടുത്തിടുകയായിരുന്നു. ഈ സിസിടിവി ദൃശ്യങ്ങളാണ് പുറത്തുവന്നത്.
അഖിലിനെ തലയോട്ടി പിളർന്ന നിലയിലാണ് ആശുപത്രിയിൽ എത്തിച്ചത്. അഖിലിന്റെ ശരീരമാസകലം മർദനമേറ്റതിന്റെ പാടുകളുണ്ട്. തലയ്‌ക്കേറ്റ പരിക്കാണ് മരണകാരണം. ഒരാഴ്ച മുമ്പ് ഒരു ബാറിലുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് റിപ്പോർട്ട്. പ്രതികളായ മൂന്ന് പേരും ലഹരിസംഘത്തിലെ ഗുണ്ടാ സംഘമെന്നാണ് പോലീസ് റിപ്പോർട്ടിൽ സൂചിപ്പിക്കുന്നത്. മാത്രമല്ല ഇവരിൽ രണ്ടു പേര് കൊലക്കേസ് പ്രതികളാണ്. മരിച്ച അഖിൽ വെമ്പായത്ത് മീൻ കച്ചവടം നടത്തിവരികയായിരുന്നു.
