തിരുവനന്തപുരം: തിരുവനന്തപുരത്ത് വീട്ടമ്മയുടെ കണ്ണിൽ മുളകുപൊടി വിതറിയ ശേഷം മാല പൊട്ടിച്ചോടിയ പ്രതിയെ പിടികൂടി പൊലീസ്. അയിരൂരിലാണ് സംഭവം നടന്നത്. ഇലകമൺ തോണിപ്പാറ ബിന്ദു നിവാസിൽ സുലഭയുടെ മാലയാണ് മോഷണം പോയത്.
26 -കാരനായ ആരോമലാണ് ആക്രമണം നടത്തിയത്. സംഭവം നടന്ന് ഒരു മണിക്കൂറിനകം തന്നെ പോലീസ് പ്രതിയെ പിടികൂടി. ഇന്നലെ ഉച്ചയോടെ സുലഭയുടെ വീടിന്റെ അടുക്കളയ്ക്ക് സമീപം എത്തിയ പ്രതി പേപ്പറിൽ കരുതിയിരുന്ന മുളകുപൊടി സുലഭയുടെ മുഖത്ത് വിതറുകയും അതിനു ശേഷം തോർത്ത് വച്ച് മുഖം മൂടുകയും ചെയ്തു.
അതിനു ശേഷമാണ് കഴുത്തിൽ കിടന്ന മാല പൊട്ടിച്ചുകൊണ്ട് കടന്നുകളഞ്ഞത്ത്. മൂന്നര പവന്റെ മാലയാണ് ഇയാൾ കവർന്നത്. തുടർന്ന് സുലഭ ബഹളം വച്ചതോടെ അയൽവാസികൾ ഓടികൂടുകയും ഉടൻ തന്നെ പോലീസിൽ അറിയിക്കുകയുമായിരുന്നു. തുടർന്ന് പോലീസ് നടത്തിയ അന്വേഷണത്തിലാണ് പ്രതിയെ പിടികൂടിയത്.
Share This Post
