ശ്രീകാര്യം: തിരുവനന്തപുരം ശ്രീകാര്യത്ത് വായോധികയെ തോട്ടിൽ മരിച്ച നിലയിൽ കണ്ടെത്തി. തേക്കുംമൂട് കണ്ടത്തിങ്കൽ വീട്ടിൽ വി.എസ്. ശൈലജ ആണ് മരിച്ചത്. 72 വയസായിരുന്നു.
ശ്രീകാര്യം ഇടവ്ക്കോടി നടുത്ത് തോട്ടിൽ നിന്നാണ് മൃതദേഹം കണ്ടെത്തിയത്. ശ്രീകാര്യത്ത് മകളെ കാണാൻ എത്തിയതായിരുന്നു ശൈലജ. ശ്രീകാര്യം കല്ലമ്പള്ളി പ്രതിഭ നഗറിലാണ് ശൈലജയുടെ മകളായ ഡോ. അഞ്ജുവും മരുമകൻ ഡോ. രഞ്ജു രവീന്ദ്രനും താമസിക്കുന്നത്. ഇവരെ കാണാനാണ് ശൈലജ എത്തിയത്. ഇന്നലെ സന്ധ്യക്കാണ് സംഭവം നടന്നത്. ശൈലജയുടെ വീട്ടിൽ നിന്നും ഓട്ടോയിൽ ശ്രീകാര്യത്തു വന്ന ശൈലജയെ ഓട്ടോ ഡ്രൈവർ വീടിനു സമീപം ഇടറോഡിൽ ഇറക്കുകയായിരുന്നു.
അവിടെ നിന്ന് പ്രതിഭ നഗറിൽ പോക്കേണ്ട ശൈലജ വഴി തെറ്റി വലത്തോട്ടുള്ള മുളവൂർ ലൈനിലേയ്ക്കു നടക്കുമ്പോൾ തെന്നി സമീപത്തെ കലിങ്കിനോടു ചേർന്ന ഓടയിൽ വീണതാകാം എന്നാണ് പൊലീസ് പറയുന്നത്. ഇന്ന് രാവിലെ ഇതു വഴി പോയവരാണ് മൃതദേഹം കണ്ട് പൊലീസിൽ അറിയിച്ചത്.
അതേ സമയം ഇന്നലെ ശൈലജെ കാണാനില്ലെന്ന് പറഞ്ഞ് മെഡിക്കൽ കോളേജ് പോലീസിൽ ബന്ധുക്കൾ പരാതി നൽകിയിരുന്നു. പരാതിയുടെ അടിസ്ഥാനത്തിൽ അന്വേഷണം നടക്കവേയാണ് മൃതദേഹം കണ്ടെത്തിയത്.
കൊട്ടാരക്കര താലൂക്ക് ആശുപത്രിയിലെ ഡോക്ടർ ആണ് അഞ്ജു. മൂംബൈയിൽ സ്വകാര്യ ആശുപത്രിയിൽ ജോലി ചെയ്യുന്ന അശ്വിൻ ആണ് മറ്റൊരു മകൾ . പാരിപ്പള്ളി മെഡിക്കൽ കോളജ് ആശുപത്രിയിൽ ജോലി ചെയ്യുന്ന രഞ്ജു രവീന്ദ്രൻ ആണ് മരുമകൻ. സംസ്കാരം നാളെ ശാന്തികവാടത്തിൽ.
