തിരുവനന്തപുരം: കഴക്കൂട്ടത്ത് നിർത്തിയിട്ടിരുന്ന കാറിൽ നിന്നും പണവും മൊബൈൽ ഫോണുകളും മോഷ്ടിച്ച കേസിലെ പ്രതികൾ പിടിയിൽ. കഴക്കൂട്ടം അശ്വതി സിൽക്‌സിനു സമീപം പാർക്ക്‌ ചെയ്തിരുന്ന വാഹനത്തിൽ നിന്നാണ് പ്രതികൾ ഫോണുകളും പണവും കവർന്നത്.
സംഭവത്തിൽ പുനലൂർ സ്വദേശിയായ ഉണ്ണിമോനും പള്ളിപ്പുറം സ്വദേശിയായ കുമാറുമാണ് പോലീസിന്റെ പിടിയിലായത്. കഴിഞ്ഞ ദിവസമാണ് കേസിനാസ്പദമായ സംഭവം നടന്നത്. കടയ്ക്ക് മുന്നിൽ വാഹനം ലോക്ക് ചെയ്യാതെ ആയിരുന്നു നിർത്തിയിട്ടിരുന്നത്. കടയിൽ നിന്ന് തിരികെ കാറിൽ എത്തിയപ്പോഴാണ് വാഹന ഉടമ മോഷണം നടന്ന വിവരം അറിഞ്ഞത്.
ഉടൻ തന്നെ കഴക്കൂട്ടം പോലീസിൽ വിവരമറിയിക്കുകയായിരുന്നു. പോലീസ് സ്ഥലത്തെത്തി സി സി ടി വി കേന്ദ്രീകരിച്ച് നടത്തിയ പരിശോധനയിലാണ് പ്രതികളെ പിടികൂടിയത്.
Share This Post
