തിരുവനന്തപുരം: തിരുവനന്തപുരത്ത് യുവാവിനെ കുത്തിക്കൊലപ്പെടുത്തി. കരമന ഇടഗ്രാമം സ്വദേശി ഷിജോയാണ് കൊല്ലപ്പെട്ടത്. കുടുംബവഴക്കിനെ തുടർന്നാണ് കൊലപാതകമെന്നാണ് പൊലീസിന്റെ പ്രാഥമിക നിഗമനം. കഴുത്തിനോടു ചേര്ന്നാണ് ഷിജോക്ക് കുത്തേറ്റത്.
രണ്ട് പേര്ക്കാണ് കുത്തേറ്റത്. ഷിജോക്ക് പുറമെ ജിജോ എന്നയാൾക്കും കുത്തേറ്റു. ജിജോയെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവത്തിൽ പ്രതിയെ പോലീസ് പിടികൂടി. കരമന സ്വദേശി അജീഷാണ് പൊലീസിന്റെ കസ്റ്റഡിയിലുള്ളത്.
കൊലപാതകം നടന്ന വീട്ടിലെ താമസക്കാരനായ അജയന്റെ സഹോദരിയുടെ ഭര്ത്താവാണ് പിടിയിലായ അജീഷ്. ഇന്നലെ വൈകിട്ട് അജയന്റെ ഭാര്യാസഹോദരനൊപ്പമാണ് ഷിജോയും ജിജോയും ഈ വീട്ടിലേക്ക് എത്തുന്നത്. ഇവര് തമ്മിലേക്കുള്ള വാക്ക് തര്ക്കം കൊലപാതകത്തിൽ കലാശിക്കുകയായിരുന്നു എന്നാണ് പൊലീസ് പറയുന്നത്. അതേസമയം പ്രതി പൊലീസിനോട് കുറ്റം സമ്മതിച്ചിട്ടില്ലെന്ന് വിവരം.
