തിരുവനന്തപുരം: തിരുവനന്തപുരത്ത് 30 കുപ്പി ഇന്ത്യൻ നിർമിത വിദേശമദ്യം പിടിച്ചെടുത്ത് എക്സൈസ്. തെരഞ്ഞെടുപ്പ് സ്പെഷ്യൽ ഡ്രൈവിന്റെ ഭാഗമായി നടത്തിയ പരിശോധനയിലാണ് വിദേശ മദ്യം പിടിച്ചെടുത്തത്. നെടുമങ്ങാട് നിന്നാണ് എക്സൈസ് സംഘം മദ്യക്കുപ്പികൾ പിടിച്ചെടുത്തത്.
നന്ദിയോട് ചൂടൽ ഭാഗത്ത് ഇന്നലെ നടത്തിയ തിരച്ചിലിൽ റബ്ബർ തോട്ടത്തിനിടയിലെ പുരയിടത്തിൽ നിന്നാണ് ചാക്കിൽ ഒളിപ്പിച്ചിരുന്ന അര ലിറ്ററിന്റെ 30 കുപ്പി മദ്യം പിടിച്ചെടുത്തത്. മദ്യം ഒളിപ്പിച്ച ആളെ പിടികൂടാനായിട്ടില്ല. ഇയാൾക്കായിട്ടുള്ള തിരച്ചിൽ പുരോഗമിക്കുകയാണ്.
നെടുമങ്ങാട് എക്സൈസ് സർക്കിൾ ഓഫീസിലെ അസി. എക്സൈസ് ഇൻസ്പെക്ടർ വി.അനിൽ കുമാറിന്റെ നേതൃത്വത്തിലാണ് പരിശോധന നടത്തിയത്. ഇലക്ഷൻ പ്രമാണിച്ച് ഇന്നലെ വൈകുന്നേരം മുതൽ മദ്യശാലകൾ അവധിയായതിനാൽ വരും ദിവസങ്ങളിൽ വില്പനക്കായി മുൻകൂട്ടി മദ്യം വാങ്ങിശേഖരിച്ചതാണെന്ന് ഉദ്യോഗസ്ഥർ പറഞ്ഞു.
