തിരുവനന്തപുരം : തിരുവനന്തപുരത്ത് സുഹൃത്തുക്കള്ക്കൊപ്പം നദിയിൽ കുളിക്കാനിറങ്ങിയ പത്താംക്ലാസ് വിദ്യാര്ത്ഥികളായ രണ്ടുപേര് മുങ്ങി മരിച്ചു. തിരുവനന്തപുരം ആറ്റിങ്ങൽ കടയ്ക്കാവൂര് ഗ്രാമപഞ്ചായത്തിലെ മേലാറ്റിങ്ങൽ ഉദിയറ കുളിക്കടവിലാണ് സംഭവം. പത്താംക്ലാസ് വിദ്യാർഥികളായ രണ്ട് ആൺകുട്ടികളാണ് മരിച്ചത്. കല്ലൂർക്കോണം പുത്തൻവിള വീട്ടിൽ ഗോകുൽ (15), ചാലുവിള വീട്ടിൽ നിഖിൽ(15) എന്നിവരാണ് മരിച്ചത്.
ഇന്നലെ വൈകിട്ടോടെയാണ് നാലുപേര് ഒന്നിച്ച് നദിയിൽ കുളിക്കാനിറങ്ങിയത്. ഇരുവരും അപകടത്തില്പ്പെട്ടതോടെ കൂടെയുണ്ടായിരുന്ന മറ്റ് രണ്ടുകൂട്ടുകാര് നാട്ടുകാരെ വിവരമറിയിക്കുകയായിരുന്നു. തുടർന്ന് ഫയർഫോഴ്സ് എത്തി നടത്തിയ തെരച്ചിലിലാണ് മൃതദേഹങ്ങള് കണ്ടെത്തിയത്.
ആദ്യം നിഖിലിന്റെ മൃതദേഹമാണ് ലഭിച്ചത്. പിന്നീട് ഗോകുലിന്റെ മൃതദേഹവും കണ്ടെത്തുകയായിരുന്നു. കല്ലൂര്ക്കോണം ഗവ. ഹൈസ്കൂള് വിദ്യാര്ത്ഥികളാണ് ഗോകുലും നിഖിലും.
