തിരുവനന്തപുരം: മുതിര്ന്ന കമ്മ്യൂണിസ്റ്റ് നേതാവായിരുന്ന വി.എസ് അച്യുതാനന്ദന് മരണാനന്തര ബഹുമതിയായി ലഭിച്ച പത്മവിഭൂഷണ് സ്വീകരിക്കേണ്ടതില്ലെന്ന് കുടുംബം തീരുമാനിച്ചു. ജനഹൃദയങ്ങളില് വി.എസിന് ലഭിച്ച സ്ഥാനമാണ് മറ്റേതൊരു പുരസ്കാരത്തേക്കാളും വലുതെന്ന് മകന് വി.എ അരുണ്കുമാര് അറിയിച്ചു. ജനഹൃദയങ്ങളിലെ സ്ഥാനം തന്നെയാണ് വലുതെന്നാണ് ഞങ്ങള് വിശ്വസിക്കുന്നതെന്നും അരുണ്കുമാര് ഫേസ്ബുക്കില് കുറിച്ചു. ജനങ്ങള് വി.എസിന് നല്കുന്ന സ്നേഹവായ്പുകള്ക്ക് നന്ദിയുണ്ടെന്നും അരുണ് കുമാര് ഫേസ്ബുക്കില് കുറിച്ചു.
അരുണ്കുമാറിന്റെ ഫേസ്ബുക്ക് പോസ്റ്റ് വായിക്കാം;
ഭാരതത്തിന്റെ പരമോന്നത സിവിലിയന് ബഹുമതികളിലൊന്നായ പത്മവിഭൂഷണ് അന്തരിച്ച എന്റെ പിതാവ് വി.എസ്. അച്യുതാനന്ദന് നല്കാന് തീരുമാനിച്ച വിവരം കേന്ദ്ര ആഭ്യന്തര മന്ത്രാലയത്തില് നിന്നും അറിയിച്ചിട്ടുണ്ട്. ഇതുമായി ബന്ധപ്പെട്ട് ഇന്ന് വന്ന കത്ത് താഴെ പങ്കുവയ്ക്കുന്നു. ജനകീയ പോരാട്ടങ്ങളിലൂടെയും അചഞ്ചലമായ രാഷ്ട്രീയ നിലപാടുകളിലൂടെയും പതിറ്റാണ്ടുകളോളം കേരളീയ പൊതുസമൂഹത്തിനൊപ്പം സഞ്ചരിച്ച വി.എസിനോട് ജനങ്ങള് കാണിക്കുന്ന സ്നേഹവും ബഹുമാനവും എന്നും ഞങ്ങള്ക്ക് വലിയ കരുത്താണ്. ഈ പുരസ്കാരം അദ്ദേഹത്തിന്റെ പൊതുജീവിതത്തോടുള്ള ആദരമായി കാണുന്നു.
