പത്തനംതിട്ട:പത്തനംതിട്ടയിൽ ബസ്സും ട്രക്കും കൂട്ടിയിടിച്ച് വൻ അപകടം. കൈപ്പട്ടൂരിൽ സ്വകാര്യ ബസ്സും കോൺക്രീറ്റ് മിക്സുമായി പോയ ട്രക്കും കൂട്ടിയിടിച്ചാണ് മറിഞ്ഞത്. അപകടത്തിൽ ഇരുപതോളം പേർക്ക് പരിക്കേറ്റതായി പ്രാഥമിക റിപ്പോർട്ടുകൾ. കൈപ്പട്ടൂർ ഗവ. സ്കൂളിനു സമീപം ഇന്ന് രാവിലെ 10 .15 നാണ് അപകടം നടന്നത്.
പത്തനംതിട്ടയിൽ നിന്നും അടൂരിന് പോയ യൂണിയൻ എന്ന സ്വകാര്യ ബസ്സാണ് മറിഞ്ഞത്. അടൂരിൽ നിന്നും പത്തനംതിട്ടയിലേക്ക് കോൺക്രീറ്റ് മിക്സുമായി വന്ന ട്രക്ക് സ്കൂളിനു മുമ്പിലെ വളവിൽ അമിത വേഗത്തിൽ തിരിഞ്ഞതാണ് അപകട കാരണം.
ഇടിയുടെ ആഘാതത്തിൽ ബസ് റോഡിന്റെ സൈഡിലേക്ക് മറിഞ്ഞു. പരിക്കേറ്റവരെ പത്തനംതിട്ടയിലെ ആശുപത്രിയിലേക്ക് കൊണ്ടുപോയി. നാട്ടുകാരും അഗ്നിരക്ഷാ സേനയും സ്ഥലത്ത് രക്ഷാപ്രവർത്തനം നടത്തിവരികയാണ്.
Share This Post
