തിരുവനന്തപുരം: യുവാവിനെ കൊലപ്പെടുത്താൻ ശ്രമിച്ച കേസിലെ പ്രതികളെ പോലീസ് പിടികൂടി. ചാല, കരിമഠം കോളനി നിവാസികളായ അജി എന്നു വിളിക്കുന്ന ഹാജ (39), മാരിയപ്പൻ (46) എന്നിവരെയാണ് ഫോർട്ട് പോലീസ് അറസ്റ്റ് ചെയ്തത്.
ശനിയാഴ്ച രാത്രി പത്തരക്ക് കരിമഠം സ്വദേശിയായ യുവാവിനെയാണ് പ്രതികൾ ആക്രമിച്ച് കൊലപ്പെടുത്താൻ ശ്രമിച്ചത്. കരിമഠം അമ്മൻ കോവിലിന് സമീപം വെച്ച് ഇവർ യുവാവിനെ ഇരുമ്പ് കമ്പി കൊണ്ട് തലക്കടിക്കുകയും, കരിങ്കല്ല് കൊണ്ട് മുഖത്തടിച്ച് കൊലപ്പെടുത്താൻ ശ്രമിക്കുകയുമായിരുന്നു. ലഹരി വിമുക്ത സംഘടനയിലെ അംഗമായതിലുള്ള വിരോധം നിമിത്തമാണ് യുവാവിനെ ആക്രമിച്ചത്.
നിരവധി കേസ്സുകളുള്ള ഇവരിൽ, പ്രതി ഹാജയ്ക്ക് ഫോർട്ട് പോലീസ് സ്റ്റേഷനിൽ 13 -ഓളം കേസുകളാണുള്ളത്, ഗുണ്ടാനിയമപ്രകാരം ശിക്ഷ അനുഭവിച്ചിട്ടുള്ള ഇയാൾക്ക് കൊലപാതകം, മോഷണം, പിടിച്ചുപറി, കഞ്ചാവ് കേസ്സുകളുൾപ്പെടെ സിറ്റിയിലെ വിവിധ സ്റ്റേഷനുകളിൽ നിരവധി കേസ്സുകളുണ്ട്. ഈ കേസ്സിലെ രണ്ടാം പ്രതിയായ മാരിയപ്പനും നിരവധി ക്രിമിനൽ കേസുകളിലെ പ്രതിയാണ്. കോടതിയിൽ ഹാജരാക്കിയ പ്രതികളെ റിമാന്റ് ചെയ്തു.
