തിരുവനന്തപുരം: താനൂർ കസ്റ്റഡിമരണത്തിൽ ആരോപണവുമായി മുതിർന്ന കോൺഗ്രസ് നേതാവ് രമേശ് ചെന്നിത്തല. ജിഫ്രിയുടെ മരണത്തിന് ഉത്തരവാദികളായ ഉദ്യോഗസ്ഥർക്കെതിരെ നടപടി വേണമെന്നാണ് അദ്ദേഹം പറയുന്നത്. ഇക്കാര്യവുമായി ബന്ധപ്പെട്ട് സിബിഐ അന്വേഷണം വേണമെന്ന് ചൂണ്ടിക്കാട്ടി മുഖ്യമന്ത്രിക്ക് ചെന്നിത്തല കത്ത് നൽകി.
ഇവിടെ കുറ്റവാളികളായ ഉദ്യോഗസ്ഥരെ സംരക്ഷിക്കുന്ന തലത്തിലാണ് കാര്യങ്ങൾ നീങ്ങുന്നത്. ജിഫ്രിയുടെ കസ്റ്റഡി മരണം ഗൗരവമായ കുറ്റകൃത്യമാണ്. അയാൾ ചെയ്ത കുറ്റത്തെ താൻ ന്യായീകരിക്കുന്നില്ല. പക്ഷെ കസ്റ്റഡിയിൽവെച്ച് മർദിച്ചു കൊലപ്പെടുത്താൻ ആരാണ് പൊലീസിന് അനുവാദം നൽകിയതെന്നും അദ്ദേഹം ചോദിച്ചു. കസ്റ്റഡിമരണം ഉണ്ടാകുന്ന സാഹചര്യത്തിൽ എന്ത് ചെയ്യണമെന്ന് സുപ്രീംകോടതി നിർദേശിച്ചിട്ടുണ്ട്. അതനുസരിച്ചുള്ള നടപടി സ്വീകരിക്കാൻ പൊലീസ് തയാറാകുന്നില്ലെന്നും അദ്ദേഹം കുറ്റപ്പെടുത്തി.
Share This Post
