തിരുവനന്തപുരം: വയോധികയെയും മകളെയും ഗുണ്ടാസംഘം വീട്ടിൽ കയറി മർദിച്ചു. തിരുവനന്തപുരം വെള്ളറടയിലാണ് സംഭവം. വഴിത്തർക്കത്തിന്‍റെ പേരിലാണ് അക്രമം. വെള്ളറട മരപ്പാലം സ്വദേശി സുന്ദരി (75), മകൾ ഗീത (46) എന്നിവ‌ർക്കാണ് മർദനമേറ്റത്. മർദനത്തിന്റെ സിസി ടിവി ദൃശ്യങ്ങൾ ഉൾപ്പടെ പുറത്ത് വന്നിട്ടുണ്ട്. ദൃശ്യങ്ങളിൽ ശബ്ദേ കേട്ട് പുറത്തേക്ക് വരുന്ന ഗീതയെ വെള്ള ഷർട്ടും മുണ്ടും ധരിച്ചയാൾ മർദിക്കുന്നത് കാണാം. ഇത് കണ്ട് വീട്ടിൽ നിന്ന് ഓടി വന്ന വയോധികയെയും ഇവർ മർദിക്കുന്നുണ്ട്.
നാലു മാസമായി വഴിയുടെ പേരിൽ തർക്കം നടക്കുകയാണ്. കോടതിയിൽ സ്റ്റേ നിലനിൽക്കെയാണ് എതിർകക്ഷികൾ വീട്ടിൽ കയറി അതിക്രമം കാട്ടിയത്. സംഭവത്തിൽ വെള്ളറട പൊലീസ് അന്വേഷണം ആരംഭിച്ചു.
Share This Post
