തിരുവനന്തപുരം: സംസ്ഥാനത്ത് പോളിംഗ് കനക്കുന്നതിനിടെ ആറ്റിങ്ങൽ ഉൾപ്പെടെ വിവിധ സ്ഥലങ്ങളിൽ കള്ളവോട്ട് നടന്നതായി ആരോപണം. ആറ്റിങ്ങൽ, പത്തനംതിട്ട, അടൂർ തുടങ്ങിയ സ്ഥലങ്ങളിലാണ് നിലവിൽ കള്ളവോട്ട് നടന്നതു റിപ്പോർട്ട് ചെയ്തിരിക്കുന്നത്.
ആറ്റിങ്ങൽ മണ്ഡലത്തിലെ പോത്തൻകോടാണ് കള്ളവോട്ട് നടന്നത്. സംഭവത്തിൽ പരാതി നൽകാനൊരുങ്ങുകയാണ് വോട്ടർ. 43-ാം നമ്പർ ബൂത്തിൽ ലളിതമ്മ (66) എന്ന വോട്ടറുടെ പേരിലാണ് കള്ളവോട്ട് നടന്നത്. രാവിലെ 8 മണിക്ക് വോട്ട് ചെയ്യാനായി എത്തിയപ്പോഴാണ് മറ്റാരോ വോട്ട് ചെയ്തതായി അറിയുന്നത്.
പത്തനംതിട്ടയിലെ ഓമല്ലൂർ 205 ആം ബൂത്തിലെ വോട്ടർ ജോമോൻ കെ യേശുദാസ് വോട്ടിടാൻ എത്തിയപ്പോൾ മറ്റാരോ വോട്ട് ചെയ്തതായി കണ്ടെത്തി. അതുപോലെ അടൂരിലും കള്ളവോട്ട് എന്ന പരാതി വന്നു. അടൂർ തെങ്ങമം തോട്ടുവ സ്കൂളിലെ 134 ആം നമ്പർ ബൂത്തിലാണ് കള്ള വോട്ട് നടന്നത്.ബിന്ദു എസ് എന്ന ആളുടെ വോട്ട് ആണ് മറ്റാരോ ചെയ്തതെന്ന പരാതി ഉയര്‍ന്നത്.
