കൊല്ലം: ഭാര്യയെയും മക്കളെയും കൊലപ്പെടുത്തി ഭർത്താവ് ജീവനൊടുക്കാൻ ശ്രമിച്ചു. ശ്രീജു (46)ആണ് ഭാര്യയെയും മകളെയും കൊലപ്പെടുത്തിയത്. മകൻ ഗുരുതരാവസ്ഥയിൽ ആശുപത്രിയിലാണ്. കൊല്ലം പറവൂർ പൂതക്കുളത്താണ് സംഭവം നടന്നത്. ഭാര്യ പ്രീതയെയും (39), മകൾ ശ്രീനന്ദയെയും (14) ശ്രീജു കഴുത്തറുത്ത് കൊലപ്പെടുത്തുകയായിരുന്നു.
ആക്രമണത്തിൽ ഗുരുതരമായി പരിക്കേറ്റ ശ്രീരാഗ് (17) കൊട്ടിയത്തെ സ്വകാര്യ ആശുപത്രിയിൽ ചികിത്സയിൽ കഴിയുകയാണ്. കുടുംബത്തെ കൊലപ്പെടുത്തിയ ശേഷം ശ്രീജുവും ജീവനൊടുക്കാൻ ശ്രമിച്ചു. ഇയാൾ തിരുവനന്തപുരം മെഡിക്കല്‍ കോളേജില്‍ ചികിത്സയിലാണ്. ഭാര്യക്കും മക്കൾക്കും വിഷം നൽകിയ ശേഷമാണ് ഇയാൾ ഇരുവരെയും കഴുത്തറുത്ത് കൊലപ്പെടുത്തിയത്.
ഇന്ന് രാവിലെയാണ് സംഭവം നടന്നത്. പൂതക്കുളം കൃഷിഭവനത്തിന് സമീപമുല്ല വീട്ടിൽ വച്ചാണ് കൊലപാതകം നടത്തിയത്. കടബാധ്യതയാണ് ഇത്തരത്തിൽ ക്രൂര കൃത്യം നടത്താൻ കാരണമെന്നാണ് പ്രാഥമിക വിവരം.
രാവിലെ വീട് തുറക്കാത്തതിനെ തുറന്ന് അടുത്ത വീട്ടില്‍ താമസിക്കുന്ന സഹോദരന്‍ എത്തി പരിശോധിച്ചപ്പോഴാണ് സംഭവം പുറത്തറിയുന്നത്. ഉടൻ തന്നെ ആശുപത്രിയിൽ എത്തിച്ചെങ്കിലും പ്രീതയുടെയും ശ്രീനന്ദയുടെയും ജീവൻ രക്ഷിക്കാനായില്ല.
