കണിയാപുരം: വർഷങ്ങളായി ശാപമോക്ഷം കാത്തുകിടക്കുകയാണ് അണ്ടൂർക്കോണം പഞ്ചായത്തിലെ ഒൻപതാം വാർഡിൽ വരുന്ന പള്ളിച്ച വീട്ടുകരയിലെ സിആർപി പുതുവൽ റോഡ്. ഈ പ്രദേശത്തെ പ്രധാന ജനവാസ കേന്ദ്രമാണ് ഇത്. 15 വർഷം മുന്നേയാണ് ഈ റോഡ് അവസാനമായി ടാറിട്ടത്. പല മുന്നണികളും മാറി മാറി ഭരണത്തലപ്പത്ത് വന്നുവെങ്കിലും ഈ റോഡിന് മാത്രം ഇതുവരെയും ശാപമോക്ഷം കിട്ടിയിട്ടില്ല.
കാൽനടയാത്രക്കാർക്ക് പോലും നടക്കാൻ കഴിയാത്ത രീതിയിൽ റോഡ് മുഴുവൻ പൊട്ടിപ്പൊളിഞ്ഞ അവസ്ഥയിലാണ്. രോഗികളെയും കൊണ്ട് പോകുന്നവരാണ് ഏറെയും ബുദ്ധിമുട്ടുന്നത്. ഈ പൊട്ടിപ്പൊളിഞ്ഞ റോഡിൽ കൂടെ പോകുമ്പോഴേക്കും രോഗിയുടെ അവസ്ഥ ഏറെ ദുരിതമാകും.
അപകടങ്ങളും ഇവിടെ പതിവാവുകയാണ്. കൂടുതലും ഇരുചക്രവാഹനക്കാരാണ് അപകടത്തിൽപ്പെടുന്നത്. രാത്രിയിൽ പരിചയമില്ലാത്തവർ ഈ റോഡിൽ കൂടി പോകുമ്പോൾ വലിയ കുഴിയിൽ വീണ് അപകടത്തിൽപ്പെടുന്നത് പതിവാവുകയാണ്.
ഇനി മഴക്കാലം കൂടി ആരംഭിക്കുമ്പോൾ ഈ റോഡിന്റെ അവസ്ഥ തികച്ചും ദയനീയമാകും. ജനങ്ങൾ പലതവണ അധികാരികൾക്ക് മുന്നിൽ പരാതിയുമായി എത്തിയെങ്കിലും ഇതുവരെയും യാതൊരു നടപടിയും സ്വീകരിച്ചിട്ടില്ല.
