കുളത്തൂർ: കഴക്കൂട്ടം മൺവിളയിൽ ഹോട്ടലിന് തീപിടിച്ചു. ഇന്ന് ഉച്ചയ്ക്കാണ് അപകടം നടന്നത്. അപകടത്തിൽ ആർക്കും പരിക്കില്ല. മൺവിള കുന്നിൽ വീട്ടിൽ അബദുൾ സലാം വാടകയ്ക്ക് എടുത്ത് നടത്തുന്ന കടയിലാണ് സംഭവം നടന്നത്. കടയിലെ ഗ്യാസ് സ്റ്റൗവിൽ നിന്ന് തീ പടർന്നതാണ് അപകട കാരണമെന്നാണ് പ്രാഥമിക നിഗമനം.
മൺവിള ഇൻഡട്രിയൽ എസ്റ്റേറ്റിലെ ഫാമിലി പ്ലാസ്റ്റിക് കമ്പനി ഉടമ സിംസൻ്റെ ഉടമസ്ഥതയിലുള്ളതാണ് കെട്ടിടം. മുൻപ് മൺവിള ബാങ്ക് പ്രവർത്തിച്ചിരുന്ന പഴയ രണ്ട് നില കെട്ടിടത്തിലെ താഴത്തെ കടയിലാണ് അപകടം ഉണ്ടായത്. കഴക്കൂട്ടം ഫയർ ഫോഴ്സിൻ്റെ രണ്ട് യൂണിറ്റ് സ്ഥലത്തെത്തിയാണ് തീ അണച്ചത്.
കടയിലെ ഫർണീച്ചറുകളും അലമാരയും മറ്റ് ഉപകരണങ്ങളും കത്തിനശിച്ചു. എഴുപതിനായിരം രൂപയുടെ നഷ്ടം ഉണ്ടായതായി കടയുടമ പറഞ്ഞു.
Share This Post
