എറണാകുളം: എറണാകുളത്ത് ചികിത്സാ പിഴവിനെ തുടർന്ന് രോഗി മരിച്ചെന്ന് ആരോപണം. ആലുവ രാജഗിരി ആശുപത്രിയിൽ ശസ്ത്രക്രിയ പിഴവിനെ തുടർന്ന് രോഗി മരിച്ചെന്നാണ് പരാതിയിൽ പറയുന്നത്. തൃപ്പൂണിത്തുറ തിരുവാങ്കുളം സ്വദേശി ബിജു (54) ആണ് മരിച്ചത്. ചികിത്സയിൽ തുടരുന്നതിനിടെ ഇന്നലെ വൈകുന്നേരമാണ് ബിജു മരിച്ചത്.
നടുവേദനയ്ക്ക് കീ ഹോൾ ശസ്ത്രക്രിയയാണ് ബിജു നടത്തിയത്. ആന്തരിക രക്തസ്രാവം മൂലമാണ് മരണം സംഭവിച്ചത്. ബിജുവിന്റെ സഹോദരന് ബിനു നല്കിയ പരാതിയിലാണ് കേസെടുത്തത്.കഴിഞ്ഞ മാസം 25ന് ആയിരുന്നു ബിജു നടുവേദനയുമായി എത്തുന്നത്. പിന്നാലെ ആയിരുന്നു ശസ്ത്രക്രിയ.
ശസ്ത്രക്രിയയിലെ പിഴവ് കാരണം ആന്തരിക രക്തസ്രാവം ഉണ്ടാവുകയും ഇത് മരണത്തിലേക്ക് നയിച്ചെന്നുമാണ് കുടംബം ആരോപിക്കുന്നത്. എന്നാൽ രോഗിയെ രക്ഷിക്കാൻ സാധ്യമായതെല്ലാം ചെയ്തുവെന്ന് ആശുപത്രി അധികൃതർ വ്യക്തമാക്കി. കീ ഹോൾ ശസ്ത്രക്രിയയ്ക്ക് ശേഷം ഇദ്ദേഹത്തിന്റെ വയറിന്റെ ഭാഗം വീർത്തുവന്നു. ശസ്ത്രക്രിയയ്ക്ക് ശേഷം ഇദ്ദേഹത്തിന് യാതൊരു കുഴപ്പവും ഉണ്ടായിരുന്നില്ലെന്നും ബിപിയിലുണ്ടായ വ്യതിയാനമാണ് മരണത്തിലേക്ക് നയിച്ചതെന്നും ആശുപത്രി അധികൃതർ പറയുന്നു.
