തിരുവനന്തപുരം: വർക്കലയിൽ ബൈക്ക് നിയന്ത്രണംവിട്ട് അപകടം. വെട്ടൂർ വിളബ്ഭാഗം ഗവ. എൽപി സ്കൂളിനു സമീപം തെങ്ങുവിള വീട്ടിൽ അനില(54)യാണ് മരിച്ചത്. ചൊവ്വാഴ്ചയാണ് അപകടം നടന്നത്. രാവിലെ മരുമകനൊപ്പം ബൈക്കിൽ യാത്ര ചെയ്യുമ്പോഴായിരുന്നു അപകടം.
വിളബ് ഭാഗം ഷാപ്പുമുക്കിൽനിന്ന് വലയന്റെകുഴി റോഡ് തുടങ്ങുന്ന ഭാഗത്തെ ഹമ്പിൽ ബൈക്ക് കയറിയപ്പോഴാണ് ബൈക്കിന്റെ നിയന്ത്രണം നഷ്ടപ്പെട്ടത്. ഉടൻ തന്നെ പിൻസീറ്റിലിരുന്ന വീട്ടമ്മ പിടിവിട്ട് താഴെ വീഴുകയായിരുന്നു.
തലയ്ക്കു പരിക്കേറ്റ ഇവരെ വർക്കലയിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. തുടർന്ന് അവിടെ നിന്ന് വെഞ്ഞാറമൂട്ടിലെ സ്വകാര്യ ആശുപത്രിയിലും പ്രവേശിപ്പിച്ചു. ചികിത്സയിലിരിക്കേയാണ് ഇന്നലെ ഉച്ചയോടെ മരിച്ചത്. അറ്റിങ്ങൽ അർബൻ കോ-ഓപ്പറേറ്റീവ് സൊസൈറ്റി ജീവനക്കാരിയാണ് അനില.
Share This Post
