തിരുവനന്തപുരം: ശബരിമല സ്വര്ണക്കൊള്ള കേസില് തൊണ്ടിമുതല് പോലും കണ്ടെത്താന് കഴിയാതെ അന്വേഷണം ഇഴഞ്ഞുനീങ്ങുകയാണെന്ന് പ്രതിപക്ഷ നേതാവ് വി ഡി സതീശന്. സിപിഐഎമ്മിന്റെ ഉന്നത നേതാക്കള് കേസില് അറസ്റ്റിലാകാതിരിക്കാനാണ് അന്വേഷണവും കുറ്റുപത്രവും വൈകിപ്പിക്കുന്നതെന്നും വിഡി സതീശന് നിയമസഭയില് ആരോപിച്ചു. കേസില് പ്രത്യേക അന്വേഷണസംഘം കുറ്റപത്രം സമര്പ്പിക്കാത്തത് പ്രതികള്ക്ക് സ്വാഭാവിക ജാമ്യം ലഭിക്കാന് കാരണമാകുമെന്നും അദ്ദേഹം ചൂട്ടിക്കാട്ടി. സ്വാഭാവിക ജാമ്യം നേടി പ്രതികള്ക്ക് പുറത്തിറങ്ങുന്നതോടെ തെളിവുകള് പൂര്ണമായി നശിപ്പിക്കപ്പെടുമെന്നും വി ഡി സതീശന് ആരോപിച്ചു. അന്വേഷണം മുന്നോട്ടുപോയാല് സിപിഐഎം നേതാക്കള് ജയിലിലാകുമെന്ന ഭയം സര്ക്കാരിനുണ്ട്. പ്രതിപക്ഷം സഭയ്ക്ക് അകത്തും പുറത്തും ഈ വിഷയത്തില് ശക്തമായ പ്രതിഷേധം ഉയര്ത്തുമെന്നും അദ്ദേഹം കൂട്ടിച്ചേര്ത്തു. അമ്പലം വിഴുങ്ങികള് എന്ന ബാനര് ഉയര്ത്തി സിപിഐഎമ്മിനെതിരെ പ്രതിഷേധിക്കുകയാണ് പ്രതിപക്ഷം.
