തിരുവനന്തപുരം: തിരുവനന്തപുരം ആറ്റിങ്ങലിൽ ഗ്രാഫിക്സ് സ്ഥാപനം കത്തിനശിച്ചു. ആറ്റിങ്ങൽ കച്ചേരി ജങ്ഷന് സമീപം പ്രവർത്തിക്കുന്ന ‘കൂൾമേറ്റ് ഗ്രാഫിക്സ്’ എന്ന സ്ഥാപനത്തിലാണ് തീപിടുത്തം ഉണ്ടായത്. ഇന്ന് പുലർച്ചെ നാല് മണിക്ക് ശേഷമായിരുന്നു സംഭവം നടന്നത്.
സ്ഥാപനത്തിൽനിന്ന് പുക ഉയരുന്നത് കണ്ട സമീപം വഴി കടന്നുപോയവരാണ് ഫയർ ഫോഴ്സിൽ വിവരം അറിയിച്ചത്. ഉടൻ തന്നെ ഫയർ ഫോഴ്സ് എത്തി തീ അണയ്ക്കാനുള്ള പ്രവർത്തികൾ ചെയ്തിരുന്നു. അതിനാൽ തന്നെ സമീപത്തെ കടകളിലേക്ക് തീ പടരുന്നത് തടയാനായി. ഷോർട്ട് സർക്യൂട്ടാകാം അപകടകാരണമെന്നാണ് പ്രാഥമിക നിഗമനം.
അതെ സമയം അപകടത്തിൽ സ്ഥാപനം പൂർണമായും കത്തിനശിച്ചു. കെട്ടിടത്തിനുള്ളിൽ ഉണ്ടായിരുന്ന ഫ്ലെക്സ് പ്രിന്റിങ് മെഷീനുകൾ, ബോർഡ് മേക്കിങ് യൂണിറ്റുകൾ, യുപിഎസ്, കമ്പ്യൂട്ടറുകൾ, സ്റ്റിക്കർ കട്ടിങ് ഡിജിറ്റൽ പ്രിന്റിംഗ് യൂണിറ്റ്, ഇൻവെർട്ടർ എന്നിവ പൂർണ്ണമായും കത്തിനശിച്ചു. ഒരു കോടിയോളം രൂപ വിലമതിക്കുന്ന ഉപകരണങ്ങളും സാധനങ്ങളാണ് കത്തിയതെന്ന് ഉടമ പറയുന്നു.
