ട്രെയിനിൽ പരിചയപ്പെട്ട പെൺകുട്ടിയെ പീഡിപ്പിച്ചു: അസാം സ്വദേശി അറസ്റ്റിൽ
കഴക്കൂട്ടം: ട്രെയിനിൽ വച്ചു പരിചയപ്പെട്ട പതിനാറുകാരിയെ സൗഹൃദം നടിച്ച് കഴക്കൂട്ടത്തെ താമസസ്ഥലത്ത് എത്തിച്ച് പീഡിപ്പിച്ച സംഭവത്തിൽ അസാം സ്വദേശി അറസ്റ്റിൽ. അസാമിലെ നാഗോൺ സ്വദേശിയായ ജൂബിൻ അഹമ്മദിനെയാണ് (18) കഴക്കൂട്ടം പോലീസ് അറസ്റ്റ് ചെയ്തത്. പ്രതിക്കെതിരെ പോക്സോ വകുപ്പുകൾ പ്രകാരം കേസെടുത്തിട്ടുണ്ട്. ചൊവ്വാഴ്ച തമ്പാനൂർ റെയിൽവേ സ്റ്റേഷനിൽ സംശയകരമായ സാഹചര്യത്തിൽ പ്രായപൂർത്തിയാകാത്ത പെൺകുട്ടിയോടൊപ്പം ജൂബിനെ റെയിൽവേ പോലീസ് കണ്ടെത്തുകയായിരുന്നു. തുടർന്ന് നടത്തിയ ചോദ്യം ചെയ്യലിലാണ് പീഡനവിവരം പുറത്തുവന്നത്. മുൻപ് ട്രെയിനിൽ വച്ചാണ് പ്രതിയെ പരിചയപ്പെട്ടതെന്ന് ത്രിപുര സ്വദേശിയായ പെൺകുട്ടി പോലീസിനോട് പറഞ്ഞു. ഈ പരിചയം പുതുക്കി കഴക്കൂട്ടത്ത് ഇയാൾ താമസിച്ചിരുന്ന വീട്ടിൽ എത്തിച്ച് ലൈംഗികമായി പീഡിപ്പിക്കുകയായിരുന്നുവെന്നും പെൺകുട്ടി മൊഴി നൽകി. റെയിൽവേ പോലീസ് കസ്റ്റഡിയിലെടുത്ത പ്രതിയെ പിന്നീട് കഴക്കൂട്ടം പോലീസിന് കൈമാറി. വൈദ്യപരിശോധനകൾക്ക് ശേഷം പെൺകുട്ടിയെ ചൈൽഡ് പ്രൊട്ടക്ഷൻ കൗൺസിലിന്റെ സംരക്ഷണ കേന്ദ്രത്തിലേക്ക് മാറ്റിയിട്ടുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
