തിരുവനന്തപുരം: തിരുവനന്തപുരത്ത് കുളത്തിലിറങ്ങി ആത്മഹത്യാഭീഷണി മുഴക്കിയ വയോധികനെ അഗ്നി രക്ഷാസേന രക്ഷപ്പെടുത്തി. തിരുവനന്തപുരം പേരൂർക്കടയിലാണ് സംഭവം നടന്നത്. പേരൂർക്കട റാന്നി ലെയിൻ സ്വദേശിയാണ് ആത്മഹത്യചെയ്യുമെന്നു പറഞ്ഞ് വെള്ളത്തിലേക്ക് ഇറങ്ങിയത്.
കഴിഞ്ഞ ദിവസം വൈകുന്നേരമാണ് സംഭവം നടന്നത്. വഴയില റാന്നി ലൈനിലെ റാന്നി കുളത്തിലിറങ്ങിയാണ് ഇയാൾ ഭീഷണി മുഴക്കിയത്. പ്രദേശവാസികൾ ഇയാളെ അനുനയിപ്പിച്ച് കരയ്ക്കെത്തിക്കാൻ ശ്രമിച്ചിരുന്നുവെങ്കിലും ഇയാൾ അതിനു വഴങ്ങിയിരുന്നില്ല. തുടർന്നാണ് നാട്ടുകാർ ഫയർ ഫോഴ്സിൽ വിവരമറിയിച്ചത്.
ഒരുമണിക്കൂറോളമാണ് ഇയാൾ വെള്ളത്തിൽ നിന്നത്. കുളത്തിൽ പായലും അടിഭാഗത്ത് ചളിയും ഉണ്ടായിരുന്നതിനാൽ തന്നെ ഇയാൾ ഫയർ ഫോഴ്സ് എത്തിയപ്പോഴേക്കും തളർന്ന് അവശനായിരുന്നു. തുടർന്ന് തിരുവനന്തപുരം യൂണിറ്റിൽ നിന്നും ഫയർഫോഴ്സ് സേന എത്തിയാണ് സുരക്ഷിതമായി ഇയാളെ കരയിലെത്തിച്ചത്.
ആത്മഹത്യശ്രമത്തിനുള്ള കാരണം വ്യക്തമല്ല. കൂടുതൽ ചോദ്യം ചെയ്യലിൽ നിന്ന് മാനസികാസ്വാസ്ഥ്യമുണ്ടായിരുന്നതായി കണ്ടെത്തി. തുടർന്ന് ഇയാളെ ആശുപത്രിയിലേക്ക് മാറ്റിയിരിക്കുകയാണ്.
