തിരുവനന്തപുരം : ഇന്നലെ രാത്രിയിൽ എകെജി സെന്ററിന് നേരെ നടന്ന ബോംബ് ആക്രമണത്തിൽ മുഖ്യമന്ത്രി പിണറായി വിജയൻ അപലപിച്ചു. പ്രകോപനം സൃഷ്ടിക്കാനും സമാധാനം തകർക്കാനുമുള്ള ശ്രമമാണ് അക്രമതികളുടെ ഭാഗത്ത് നിന്നുണ്ടായതെന്നും മുഖ്യമന്ത്രി പറഞ്ഞു.
മഹാനായ എകെജിയും എകെജിയുടെ നാമധേയത്തിലുള്ള ഓഫീസും പുരോഗമന പ്രസ്ഥാനങ്ങളും ജനങ്ങളാകെയും ഹൃദയത്തോട് ചേർത്ത് നിർത്തുന്ന വികാരമാണെന്നും അതിൽ വിള്ളലുണ്ടാക്കാനാണ് പലരുടെയും ശ്രമമെന്നും മുഖ്യമന്ത്രി അപലപിച്ചു. പ്രതികളെ ഉടൻ തന്നെ പിടികൂടി നിയമത്തിന് മുന്നിൽ കൊണ്ടുവരാനായി പൊലീസിന് നിർദേശം കൊടുത്തിട്ടുണ്ടെന്നും മുഖ്യമന്ത്രി വ്യക്തമാക്കി. മാത്രമല്ല, ഒരു പ്രകോപനങ്ങളിലും വീഴാതെ നോക്കണമെന്ന് പാർട്ടിയെയും ഇടതുപക്ഷത്തേയും സ്നേഹിക്കുന്ന എല്ലാവരോടും അഭ്യർഥന നടത്തുകയും ചെയ്തു.
