തിരുവനന്തപുരം : സംസ്ഥാനത്തെ പതിനയ്യായിരത്തിൽപ്പരം സ്കൂളുകളെ ഉൾപ്പെടുത്തി കൈറ്റ് സജ്ജമാക്കിയ സ്കൂൾവിക്കി പോർട്ടലിലെ മികച്ച സ്കൂളുകൾക്കുള്ള അവാർഡുകൾ പൊതു വിദ്യാഭ്യാസ വകുപ്പ് മന്ത്രി വി. ശിവൻകുട്ടി വിതരണം ചെയ്തു. ജില്ലയിൽ ഗവൺമെന്റ് മോഡൽ എച്ച്. എസ് എസ് വെങ്ങാനൂർ ഒന്നാം സ്ഥാനം നേടി. ഗവൺമെന്റ് എച്ച് എസ് അവനവൻചേരി, ഗവൺമെന്റ് വിഎച്ച് എസ്.എസ് വീരണകാവ് എന്നിവയ്ക്കാണ് രണ്ടും മൂന്നും സ്ഥാനം. വിജയികളായ സ്കൂളുകൾക്കുള്ള ശില്പവും പ്രശംസാപത്രവും മന്ത്രി വിതരണം ചെയ്തു. കൂടാതെ ക്യാഷ് അവാർഡുകളും സ്കൂളുകൾക്ക് ലഭിക്കും.
ഇൻഫോ ബോക്സിന്റെ കൃത്യത, ചിത്രങ്ങൾ, തനതു പ്രവർത്തനം, ക്ലബ്ബുകൾ, വഴികാട്ടി. സ്കൂൾ മാപ്പ് തുടങ്ങിയ ഇരുപത് മാനദണ്ഡങ്ങൾ അടിസ്ഥാനമാക്കിയാണ് അവാർഡുകൾ പ്രഖ്യാപിച്ചത്.
കേരള നിയമസഭാ സമുച്ചയത്തിലെ ആർ ശങ്കരനാരായണൻ തമ്പി ഹാളിൽ വച്ചു ചടങ്ങ് നിയസഭാ സ്പീക്കർ എം ബി രാജേഷ് ഉദ്ഘാടനം ചെയ്തു. ഗതാഗത വകുപ്പ് മന്ത്രി ആന്റണി രാജു മുഖ്യാതിഥിയായിരുന്നു. കൈറ്റ് സി.ഇ ഒ കെ അൻവർ സാദത്ത്, പൊതുവിദ്യാഭ്യാസ ഡയറക്ടർ ജീവൻബാബു കെ, എസ്.സി.ഇ.ആർ.ടി ഡയറക്ടർ ഡോ. ജയപ്രകാശ് ആർ കെ എന്നിവർ പങ്കെടുത്തു.
