തിരുവനന്തപുരം: സംസ്ഥാനത്ത് പാഴ്സൽ ഭക്ഷണം നൽകുന്നതിൽ പുതിയ മാനദണ്ഡവുമായി ആരോഗ്യ വകുപ്പ്. പാഴ്സൽ ഭക്ഷണത്തിൽ തീയതിയും സമയവും രേഖപ്പെടുത്തണമെന്ന് ആരോഗ്യ വകുപ്പിന്‍റെ ഉത്തരവിൽ പറയുന്നു. ഭക്ഷ്യ സുരക്ഷാ മുന്നറിയിപ്പോടു കൂടിയ സ്ലിപ്പോ സ്റ്റിക്കറോ നിർബന്ധമായും ഭക്ഷണം നൽകുന്ന കവറിൽ ഉണ്ടായിരിക്കണമെന്നാണ് നിർദ്ദേശം. ഭക്ഷണം പാകം ചെയ്ത സമയം തീയതി എത്ര സമയത്തിനുള്ളില്‍ കഴിക്കണം തുടങ്ങിയവയാണ് സ്ലിപ്പ്/ സ്റ്റിക്കർ എന്നിവയിൽ രേഖപ്പെടുത്തേണ്ടത്.
ഹൈ റിസ്ക് ഹോട്ട് ഫുഡ്സ് വിഭാഗത്തിലുൾപ്പെടുന്ന ഭക്ഷണങ്ങൾ പാകം ചെയ്ത് 2 മണിക്കൂറിനുള്ളിൽ കഴിക്കണമെന്നാണ് ഫുഡ്‌സേഫ്റ്റി സ്റ്റാന്‍റേര്‍ഡ്‌സ് റഗുലേഷന്‍സിൽ പറയുന്നത്. മാത്രമല്ല ഇത്തരം ഭക്ഷണം എത്തിക്കുവാന്‍ സമയമെടുക്കുന്ന സന്ദർഭങ്ങളിൽ 60 ഡിഗ്രി ഊഷ്മാവ് നിലനിര്‍ത്തണം. ഈ ഭക്ഷണങ്ങള്‍ സാധാരണ ഊഷ്മാവില്‍ 2 മണിക്കൂറില്‍ കൂടുതല്‍ സൂക്ഷിക്കുന്നത് ആരോഗ്യത്തിന് ഹാനികരവും മനുഷ്യ ഉപഭോഗത്തിന് യോജ്യമല്ലാത്തതുമാകാന്‍ സാധ്യതയുണ്ട്. അതിനിലാണ് ഇത്തരം നിയന്ത്രണങ്ങൾ നടപ്പാക്കാൻ തീരുമാനിച്ചതെന്ന് വീണ ജോർജ് വ്യക്തമാക്കി.
