ന്യൂഡൽഹി: കേരളത്തിൽ വന്ദേ ഭാരത് എക്സ്പ്രസിനു വിഹിതം അനുവദിച്ചുവെന്നു കേന്ദ്ര റെയിൽവേ മന്ത്രി അശ്വിനി വൈഷ്ണവ്. ഈ വർഷത്തെ ബജറ്റിൽ കേരളത്തിന് 2033 കോടി രൂപ കേന്ദ്രം അനുവദിച്ചുവെന്ന് റെയിൽവേ മന്ത്രി പറഞ്ഞു. കേരളത്തിലെത്തി റെയിൽ വികസനം സംബന്ധിച്ച് മുഖ്യമന്ത്രി പിണറായി വിജയനുമായി ചർച്ച നടത്തി ജനങ്ങൾക്കും സർക്കാരിനും സ്വീകാര്യമായ പ്രഖ്യാപനം നടത്തുമെന്ന് കേന്ദ്ര റെയിൽവെ മന്ത്രി അശ്വിനി വൈഷ്ണവ് പറഞ്ഞു.
കെ-റെയിൽ സിൽവർ ലൈൻ സംബന്ധിച്ച് സമർപ്പിച്ച കണക്ക് യാഥാർഥ്യവുമായി പൊരുത്തപ്പെടാത്തതാണെന്നും മന്ത്രി വ്യക്തമാക്കി. കേന്ദ്ര സർക്കാരിൻ്റെ അഭിമാന പദ്ധതിയായ വന്ദേ ഭാരത് എക്സ്പ്രസ് കേരളത്തിലേക്കും എത്തുകയാണ്. നിലവിൽ കർണാടകത്തിനും തമിഴ്നാടിനുമാണ് വന്ദേ ഭാരത് എക്സ്പ്രസ് നൽകിയത്.
2033 കോടി രൂപ കേരളത്തിൽ റെയിൽവെ വികസനത്തിന് വകയിരുത്തിയിട്ടുണ്ട്. ശബരി റെയിൽപ്പാതയ്ക്കായി 100 കോടി രൂപയും മാറ്റിവച്ചതായി അദ്ദേഹം അറിയിച്ചു.
