തിരുവനന്തപുരം: ആശുപത്രിയിൽ കഴിയുന്ന മുൻ മുഖ്യമന്ത്രി ഉമ്മൻചാണ്ടിയെ ആരോഗ്യമന്ത്രി വീണാ ജോർജ് സന്ദർശിച്ചു. ശ്വാസകോശ അണുബാധയെത്തുടർന്ന് നെയ്യാറ്റിൻകര നിംസ് ആശുപത്രിയിൽ ചികിത്സയിൽ കഴിയുകയാണ് അദ്ദേഹം. മുഖ്യമന്ത്രി പിണറായി വിജയന്‍റെ നിർദ്ദേശപ്രകാരമാണ് ആരോഗ്യമന്ത്രി ആശുപത്രിയിലെത്തി സന്ദർശിച്ചത്. ഡോ. മഞ്ജുവിന്‍റെ നേത്യത്വത്തിൽ മെഡിക്കൽ ബോർഡ് രൂപികരിച്ചാണ് ചികിത്സ തുടരുന്നത്. അദ്ദേഹത്തിന്‍റെ മകളുമായും ഡോക്ടർമാരുമായും സംസാരിച്ചുവെന്നും മന്ത്രി അറിയിച്ചു.
ഇന്നലെ പനിയെത്തുടർന്നാണ് ഉമ്മൻചാണ്ടിയെ ആശുപത്രിയിൽ പ്രവേശിപ്പിച്ചത്. ആന്‍റിബയോട്ടിക്കാണ് നിലവിൽ നൽകുന്നത്. തുടർ ചികിത്സ അണുബാധ മാറിയതിനുശേഷമായിരിക്കുമെന്നാണ് റിപ്പോർട്ട്. ഉമ്മൻചാണ്ടിയുടെ ആരോഗ്യസ്ഥിതി വിവരങ്ങളെക്കുറിച്ച് മുഖ്യമന്ത്രി ബന്ധുക്കളുമായി ഫോണിൽ സംസാരിച്ചിരുന്നു. ആരോഗ്യമന്ത്രിയെ ആശുപത്രിയിലേക്ക് അയക്കുമെന്നും അദ്ദേഹം പറഞ്ഞിരുന്നു. തുടർന്നാണ് ആരോഗ്യമന്ത്രി വീണാ ജോർജിന്‍റെ ആശുപത്രി സന്ദർശനം.
