തിരുവനന്തപുരം: വിദേശ കറൻസി നൽകാമെന്ന് പറഞ്ഞ് യുവാവിനെ കബളിപ്പിച്ച് 7 ലക്ഷം രൂപ തട്ടിയെടുത്ത കേസിൽ ഇതര സംസ്ഥാനക്കാരായ മൂന്നംഗ സംഘത്തെ പോലീസ് പിടികൂടി. കൊൽക്കത്ത സ്വദേശികളായ ലബിലു (27), അസാനൂർ റഹ്മാൻ (32), ഡൽഹി സ്വദേശി രാജു ഷെയ്ക്ക് (36) എന്നിവരെയാണ് കരമന പോലീസ് അറസ്റ്റ് ചെയ്തത്.
വ്യാഴാഴ്ചയാണ് കേസിനാസ്പദമായ സംഭവം നടന്നത്. കരമന സ്വദേശിയായ ശ്രീരാഗിനോട് 11 ലക്ഷം രൂപയുടെ യു. എ. ഇ ദിർഹം 7 ലക്ഷം രൂപക്ക് നൽകാമെന്ന് പറഞ്ഞ് വിശ്വസിപ്പിച്ച്, കരമന ചിലന്തിവല ക്ഷേത്രത്തിന് സമീപം വെച്ച് 7 ലക്ഷം രൂപ കൈപ്പറ്റിയ പ്രതികൾ, വിദേശ കറൻസി ആണെന്ന് പറഞ്ഞ് പേപ്പർ ചുരുളുകൾ അടങ്ങിയ ബാഗ് നൽകി കബളിപ്പിച്ച് കടന്നു കളയുകയായിരുന്നു.
യുവാവിന്റെ പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്ത്, പോലീസ് നടത്തിയ ഊർജിതമായ അന്വേഷണത്തിലാണ് ചാലക്ക് സമീപം, ഇതര സംസ്ഥാന തൊഴിലാളികൾ താമസിക്കുന്ന സ്ഥലത്ത് നിന്നും പ്രതികളെ പിടികൂടിയത്.
കരമന, എസ്.എച്ച്. ഒ സുജിത്ത്, എസ്.ഐമാരായ സന്തോഷ്, ബൈജു, രാധാകൃഷ്ണൻ, എസ്.സി.പി. ഒമാരായ സാജൻ, അഭിലാഷ്, സി.പി. ഒമാരായ ഉണ്ണികൃഷ്ണൻ, സൻജിത്ത് എന്നിവരടങ്ങിയ പോലീസ് സംഘമാണ് പ്രതികളെ പിടികൂടിയത്.
