ആലുവ: നടൻ സുരേഷ് ഗോപിക്കെതിരെ ആലുവ പൊലീസിൽ പരാതി. അവിശ്വാസികൾക്കെതിരായ പരാമർശത്തിലാണ് പരാതി. നടനെതിരെ പരാതി നൽകിയത് ആലപ്പുഴ സ്വദേശിയായ സുഭാഷ് എം തീക്കാടനാണ്. ജനങ്ങൾക്കിടയിൽ വിദ്വേഷം പടർത്താൻ ശ്രമിച്ചുവെന്നും അവിശ്വാസികൾക്കെതിരായ കലാപത്തിന് ആഹ്വാനം ചെയ്തുവെന്നും ചൂണ്ടിക്കാട്ടിയാണ് പരാതി നൽകിയത്.
ശിവരാത്രി മഹോത്സവവുമായി ബന്ധപ്പെട്ട് ആലുവ മണപ്പുറത്തു വച്ചു നടത്തിയ പ്രസംഗത്തിലായിരുന്നു സുരേഷ് ഗോപിയുടെ വിവാദ പരാമർശം. ഈ പരാമർശം സമൂഹമാധ്യമങ്ങളിലും പൊതു സമൂഹത്തിലുമടക്കം വിവാദങ്ങൾക്ക് വഴി വച്ചിരുന്നു. എന്നാൽ തന്റെ പരാമർശം തെറ്റായി വ്യാഖ്യാനിച്ചതാണെന്നാണ് സുരേഷ് ഗോപിയുടെ പ്രതികരണം
