തിരുവനന്തപുരം: സാർവ്വദേശീയ വനിതാദിനാചാരണത്തിൽ എസ് ബി ഐ കേരള സർക്കിൾ ഉന്നതാധികാരികളുടെ സ്ത്രീദ്രോഹ നടപടികൾക്കെതിരെ പ്രതികരിക്കുകയാണ് ജീവനക്കാർ. ട്രാവൻകൂർ സ്റ്റേറ്റ് ബാങ്ക് എംപ്ലോയീസ് അസോസിയേഷനാണ് പ്രതിഷേധവുമായി രംഗത്തെത്തിരിക്കുന്നത്. വ്യവസ്ഥാപിതമായി നോട്ടീസ് നൽകി നടത്തിയ പണിമുടക്കിൽ പങ്കെടുത്തുവെന്ന കാരണത്താലാണ് ഈ എസ്ബി ഇ എ അംഗങ്ങളെ തെരഞ്ഞുപിടിച്ച് ദൂരത്തേയ്ക്കു സ്ഥലം മാറ്റിയതെന്നാണ് ഭാരവാഹികൾ പറയുന്നത്.
ഓരോ അഡ്മിനിസ്ട്രേറ്റീവ് ഓഫീസിൽ നിന്നും ഈ രണ്ടു പേർ, പ്രത്യേക തസ്തികകളിലുള്ളവർ, കൂടുതലായി സ്ത്രീ ജീവനക്കാർ, ഭാരവാഹികളിൽ ചിലർ എന്നീവിധം തെരഞ്ഞെടുത്ത് ഫെബ്രുവരി മാസം സ്ഥലം മാറ്റം നടത്താൻ വല്ല പോളിസിയുണ്ടോ ബാങ്കിന്? സർവ്വവ്യവസ്ഥകളുടേയും നഗ്നമായ ലംഘനങ്ങളാണ് മാനേജ്മെൻ്റ് അധികാരികൾ നടത്തുന്നതെന്നും അവർ പറയുന്നു.
ഇത് തന്നെയാണ് MPSF-ലും നടന്നതെന്നും ബാങ്ക് തലത്തിലോ സർക്കിൾ തലത്തിലോ പോളിസി ഫ്രെയിം ചെയ്യാത്ത വിഷയമെന്നും അസോസിയേഷൻ വ്യക്തമാക്കുന്നു. ഒപ്പിടാത്ത, മാറിക്കൊണ്ടേയിരിക്കുന്ന തിട്ടൂരങ്ങളാൽ നടത്തുവാൻ തത്രപ്പെടുന്ന വിൽപന – വിപണന തന്ത്രം. ഇത് പ്രതികാര നടപടി തന്നെ ഏഴു മുതിർന്ന സ്ത്രീ ജീവനക്കാരെ അകാരണമായി സ്ഥലം മാറ്റിയ സർക്കിൾ അധികാരികളുടെ നടപടി അനീതിയും അന്യായവും അധാർമ്മികവുമാണ്. ഈ ഉത്തരവുകൾ പിൻവലിക്കണം.
പണിമുടക്കിൽ പങ്കെടുത്താൽ ജീവനക്കാരെ സ്ഥലം മാറ്റുവാനുള്ള വകുപ്പ് ഒരു മാനേജ്മെൻറിനും ആരും കൽപ്പിച്ചു കൊടുത്തിട്ടില്ലെന്നും സർക്കിൾ അധികാരികളുടെ സ്ത്രീവിരുദ്ധത അവസാനിപ്പിക്കണമെന്നും ഇവർ പറയുന്നു. ഇതേ തുടർന്ന് വനിതാദിനമായ ഇന്ന് എസ് ബി ഇ എ അംഗങ്ങൾ ബാഡ്ജ് ധരിച്ച് ജോലി ചെയ്യും. വിവിധ കേന്ദ്രങ്ങളിൽ സ്ത്രീ സഖാക്കൾ പ്രതിഷേധ ജ്വാല ഉയർത്തും.
