തിരുവനന്തപുരം: നിയമസഭ സമ്മേളനം ആരംഭിച്ചതു മുതൽ ശക്തമായ പ്രതിഷേധവുമായി പ്രതിപക്ഷം രംഗത്ത്. കഴിഞ്ഞ ദിവസങ്ങളിൽ നടന്ന സംഭവങ്ങളിൽ വാദികൾ പ്രതികളായെന്ന് പ്രതിപക്ഷ നേതാവ് വിഡി സതീശൻ പറഞ്ഞു. ജാമ്യമില്ലാ വകുപ്പ് പ്രകാരം ഏഴ് എംഎൽഎമാരെ പ്രതികളാക്കി കെസെടുത്ത സംഭവത്തിലാണ് പ്രതിപക്ഷം പ്രതിഷേധിച്ചത്. ചോദ്യോത്തര വേളക്കിടയിലും പ്രതിപക്ഷം പ്രതിഷേധം തുടർന്നു. തുടർന്ന് സ്പീക്കർ പ്രതിപക്ഷ നേതാവിന്റെ മൈക്ക് ഓഫാക്കി.
പ്രതിപക്ഷം പ്രതിഷേധമുയർത്തിയത് സഭയിൽ മുദ്രാവാക്യം വിളികളുമായാണ്. തുടർന്ന് ചോദ്യോത്തരവേള റദ്ദ് ചെയ്തു. നിയമസഭയിൽ വി.ശിവൻകുട്ടി എഴുന്നേറ്റ് ബഹളം വച്ചു. പിന്നാലെ, പണ്ട് കേസെടുത്തത് എന്തിനാണെന്ന് ശിവൻകുട്ടിക്ക് അറിയാമല്ലോ എന്ന് വിഡി സതീശൻ ചോദിച്ചു. പ്രതിപക്ഷ ബഹളത്തെതുടർന്ന് സഭ ഇന്നത്തേക്ക് പിരിഞ്ഞു.
10 മിനിറ്റിൽ താഴെ മാത്രമാണ് സഭ ചേർന്നത്. പ്രതിപക്ഷ പ്രതിഷേധ ദൃശ്യങ്ങളൊന്നും സഭ ടിവി സംപ്രേഷണം ചെയ്തിട്ടില്ല.
