തിരുവനന്തപുരം: ജൂൺ 23 വരെ ചോദ്യം ചെയ്യലിന് ഹാജരാവാനാവില്ലെന്ന് രണ്ടാം പ്രതിയായ കെപിസിസി പ്രസിഡന്‍റ് കെ. സുധാകരൻ. മോൻസൻ മാവുങ്കൽ ഉൾപ്പെട്ട പുരാവസ്തു തട്ടിപ്പ് കേസിലാണ് ചോദ്യം ചെയ്യലിന് ഹാജരാകാൻ ക്രൈംബ്രാഞ്ച് ആവശ്യപ്പെട്ടത്.
സുധാകരന്‍റെ അഭിഭാഷകർ അദ്ദേഹത്തിന് ഹാജരാവാനാവാൻ അസൗകര്യമുണ്ടെന്ന് ക്രൈംബ്രാഞ്ചിനെ അറിയിച്ചു. കേസിൽ പ്രതി ചേർത്തതുമായി ബന്ധപ്പെട്ട് കോടതിയെ സമീപിക്കുന്ന കാര്യത്തിലും ഉടൻ തീരുമാനമാവും.
കെ. സുധാകരൻ ഒരാഴ്ചത്തെ സാവകാശമാണ് ആവശ്യപ്പെട്ടിരിക്കുന്നത്. പാർട്ടി പരിപാടികൾ നടന്നു കൊണ്ടിരിക്കുകയാണെന്നും മറ്റ് ചില നിശ്ചയിച്ച പരിപാടികളുമുണ്ടെന്നും അദ്ദേഹം പറഞ്ഞു. പുതിയ തീയതിയറിയിച്ചുള്ള നോട്ടീസ് അയക്കുന്നതുമായി സംബന്ധിച്ച നടപടികൾ ഉടൻ ആരംഭിക്കുമെന്ന് ക്രൈംബ്രാഞ്ച് അറിയിച്ചു.
ക്രൈംബ്രാഞ്ച് ആദ്യം ജൂൺ 14 ഹാജരാവാനാണ് സുധാകരന് നോട്ടീസ് നൽകിയിരുന്നത്. എന്നാൽ ഹാജരാവാനാവില്ലെന്ന് സുധാകരൻ നിലപാടറിയിച്ചതിനെ തുടർന്ന് ജൂൺ 23 ലേക്ക് നോട്ടീസ് നൽകുകയായിരുന്നു.
