പാലക്കാട്: എസ്എഫ്ഐ മുൻ നേതാവ് കെ. വിദ്യ പൊലീസ് കസ്റ്റഡിയില്‍. മഹാരാജാസ് കോളെജിന്‍റെ പേരില്‍ വ്യാജ പ്രവൃത്തിപരിചയ സര്‍ട്ടിഫിക്കറ്റ് തയാറാക്കിയ കേസിലാണ് അറസ്റ്റ്. വിദ്യയെ കോഴിക്കോട് മേപ്പയ്യൂരില്‍ നിന്നാണു അഗളി പൊലീസ് കസ്റ്റഡിയില്‍ എടുത്തത്. കേസ് രജിസ്റ്റര്‍ ചെയ്തു പതിനഞ്ചു ദിവസം പിന്നിടുമ്പോഴാണു നടപടി. അഗളിയില്‍ എത്തിച്ച് അറസ്റ്റ് രേഖപ്പെടുത്തിയ ശേഷം കോടതിയില്‍ ഹാജരാക്കും.
അഗളി പൊലീസും നീലേശ്വരം പൊലീസും വ്യാജ സര്‍ട്ടിഫിക്കറ്റ് കേസില്‍ കേസ് രജിസ്റ്റര്‍ ചെയ്തിരുന്നു. ഈ കേസുകളില്‍ വിദ്യ ഹൈക്കോടതിയില്‍ സമര്‍പ്പിച്ച മുന്‍കൂര്‍ ജാമ്യഹര്‍ജികള്‍ പിന്നീട് പരിഗണിക്കാനായി കഴിഞ്ഞദിവസം മാറ്റി. അതിനു പിന്നാലെയാണു വിദ്യ പൊലീസ് കസ്റ്റഡിയിലായിരിക്കുന്നത്. കോഴിക്കോട് മേപ്പയ്യൂരില്‍ സുഹൃത്തിന്‍റെ വീട്ടില്‍ നിന്നാണു വിദ്യയെ പിടികൂടിയതെന്നാണു വിവരം.
