എറണാകുളം: ചമ്പക്കരയിൽ സ്വകാര്യ ആയുർവേദ ആശുപത്രിയിലെ ലിഫ്റ്റ് പൊട്ടിവീണു. അപകടത്തിൽ 2 പേർക്ക് പരിക്ക്. ലിഫ്റ്റിന്റെ റോപ്പ് തെന്നിമാറിയതാകാം അപകടകാരണം എന്നാണ് പ്രാഥമിക നിഗമനം.
സൂര്യസരസ്സ് എന്ന സ്വകാര്യ ആശുപത്രിയിലാണ് അപകടം നടന്നത്. ഞായറാഴ്ച രാവിലെ 8 മണിയോടെയായിരുന്നു സംഭവം. പരിക്കേറ്റത് ആശുപത്രിയിലെ ജീവനക്കാരി സോന, ചികിത്സയ്ക്കെത്തിയ ഒഡീഷ സ്വദേശി പ്രത്യൂഷ് എന്നിവർക്കാണ്. നട്ടെല്ലിനും കൈക്കും പരിക്കേറ്റ ഇവരെ സമീപത്തെ മറ്റൊരു ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമാണെന്ന് അഗ്നിശമന സേന അറിയിച്ചു. ഇരുവരേയും അഗ്നിശമന സേന എത്തി ലിഫ്റ്റ് പൊളിച്ചാണ് രക്ഷപ്പെടുത്തിയത്.
3 നിലകളുള്ള കെട്ടിടത്തിൽ ഹൈഡ്രോളിക് സംവിധാനത്തിൽ പ്രവർത്തിക്കുന്ന ലിഫ്റ്റ് സ്ഥാപിച്ചത് ഒരു വർഷം മുപാണ്. ഈ ലിഫ്റ്റിന് ലൈസൻസ് ഉണ്ടായിരുന്നില്ല. ലൈസന്സ് അപേക്ഷ നിരസിച്ചത് നിർമാണത്തിലെ അപാകതയെ തുടർന്നാണ്. കൂടാതെ അപാകത പരിഹരിച്ച് വീണ്ടും അപേക്ഷിക്കാന് നിർദേശിച്ചു. എന്നാൽ അനുവാദമില്ലാതെ ഈ ലിഫ്റ്റ് ഉപയോഗിക്കുകയായിരുന്നു.
