തിരുവനന്തപുരം: പുതുപ്പള്ളി ഉപതെരഞ്ഞെടുപ്പിന്റെ പശ്ചാത്തലത്തില് കോട്ടയം ജില്ലയില് ഓണക്കിറ്റ് വിതരണം നിർത്തിവെയ്ക്കരുതെന്ന് ചൂണ്ടിക്കാട്ടി പ്രതിപക്ഷ നേതാവ് വി.ഡി. സതീശൻ മുഖ്യതെരഞ്ഞെടുപ്പ് ഓഫീസർക്ക് കത്ത് നൽകി. ഓണാഘോഷത്തിന് കിറ്റിനെ ആശ്രയിക്കുന്ന ആയിരക്കണക്കിന് കുടുംബങ്ങളെ ബാധിക്കുന്നതാണ് ഈ തീരുമാനമെന്ന് സതീശൻ കത്തിലൂടെ ചൂണ്ടിക്കാട്ടി.
പുതുപ്പള്ളിയില് ഉപതെരഞ്ഞെടുപ്പ് നടക്കുന്നതിലെ സാങ്കേതികത്വം കിറ്റ് വിതരണത്തിന് തടസമാകാന് പാടില്ല. ഓണം ആഘോഷിക്കാന് കാത്തിരിക്കുന്ന പാവങ്ങളുടെ പ്രതീക്ഷകള് തല്ലിക്കെടുത്തുന്നതാകരുത് തെരഞ്ഞെടുപ്പ് കമ്മീഷന്റെ തീരുമാനം. ഈ സാഹചര്യത്തില് കേട്ടയം ജില്ലയിലും ഓണ കിറ്റ് വിതരണത്തിന് അടിയന്തിര അനുമതി നല്കണം.
60 വയസിന് മുകളില് പ്രായമുള്ള പട്ടിക വര്ഗക്കാര്ക്ക് ഓണ സമ്മാനമായി 1,000 രൂപ നല്കുന്ന പദ്ധതിയില് നിന്നും കോട്ടയം ജില്ലയെ തത്കാലത്തേക്ക് ഒഴിവാക്കിയതായി കാണുന്നു. ഉപതെരഞ്ഞെടുപ്പിന്റെ പശ്ചാത്തലത്തിലുള്ള ഈ തീരുമാനവും പിന്വലിക്കണമെന്നും പ്രതിപക്ഷ നേതാവ് കത്തിലൂടെ അഭ്യർഥിച്ചു.
