തിരുവനന്തപുരം: ‘ആര്ദ്രം ആരോഗ്യം’ പരിപാടിയുടെ ഭാഗമായി ആരോഗ്യ വകുപ്പ് മന്ത്രി വീണാ ജോര്ജ് തിരുവനന്തപുരം ജില്ലയിലെ ആശുപത്രികള് സന്ദര്ശിച്ചു. ആശുപത്രികളില് നടക്കുന്ന നിര്മ്മാണ പ്രവര്ത്തനങ്ങള് സമയബന്ധിതമായി പൂര്ത്തിയാക്കണമെന്ന് മന്ത്രി പറഞ്ഞു. മാത്രമല്ല ആശുപത്രികളില് നിന്നുള്ള പ്രതികരണങ്ങൾ ഉള്ക്കൊണ്ട് ജനകീയപങ്കാളിത്തത്തോടെ ആര്ദ്രം മിഷന്റെ ലക്ഷ്യങ്ങള് സാക്ഷാത്കരിക്കുക എന്നുള്ളതാണ് ഈ പരിപാടിയിലൂടെ ലക്ഷ്യമിടുന്നതെന്നും മന്ത്രി പറഞ്ഞു.
ജില്ലയില് ഒന്നാം ഘട്ടമായി വര്ക്കല താലൂക്ക് ആശുപത്രി, ചിറയിന്കീഴ് താലൂക്ക് ഹെഡ്ക്വാര്ട്ടേഴ്സ് ആശുപത്രി, ആറ്റിങ്ങല് താലൂക്ക് ആശുപത്രി എന്നിവിടങ്ങളിലാണ് സന്ദര്ശിച്ചത്. വര്ക്കലയില് വി. ജോയ് എം.എല്.എ.യും ചിറയിന്കീഴ് വി. ശശി എംഎല്എയും ആറ്റിങ്ങലില് ഒ.എസ്. അംബിക എം.എല്.എ.യും മറ്റ് ജനപ്രതിനിധികളും ആരോഗ്യ വകുപ്പ് ഡയറക്ടര് ഉള്പ്പെടെയുള്ള ഉന്നത ഉദ്യോഗസ്ഥരും മന്ത്രിയോടൊപ്പം സന്ദര്ശനം നടത്തി.
ആശുപത്രികളുടെ വികസന പ്രവര്ത്തനങ്ങള് നേരിട്ട് കാണാനും അവിടുത്തെ സേവനങ്ങള് എങ്ങനെയാണ് അനുഭവവേദ്യമാകുന്നത് എന്ന് ജനങ്ങളില് നിന്നും നേരിട്ട് കേള്ക്കാനുമാണ് ആശുപത്രികള് സന്ദര്ശിക്കുന്നത്. തിങ്കളാഴ്ചയാണ് ആര്ദ്രം ആരോഗ്യം പരിപാടി ആരംഭിച്ചത്.
