തിരുവനന്തപുരം: സംസ്ഥാനത്തെ റേഷൻ കടകളുടെ പ്രവൃത്തി ദിനങ്ങളെ സംബന്ധിച്ച് പുതിയ ഉത്തരവുമായി ഭക്ഷ്യ പൊതുവിതരണ വകുപ്പ് മന്ത്രി ജി ആർ അനിൽ. അടുത്ത മാസം മുതൽ റേഷൻ കടകൾക്ക് മാസത്തിലെ ആദ്യ പ്രവർത്തി ദിനം അവധിയായിരിക്കുമെന്ന് മന്ത്രി ജി ആർ അനിൽ അറിയിച്ചു.
നിലവിൽ ഒരു മാസത്തെ റേഷൻ വിതരണം കഴിഞ്ഞ് അടുത്ത മാസത്തെ റേഷൻ വിതരണം ആരംഭിക്കും മുൻപ് ഇപോസ് മെഷീനിൽ ക്രമീകരണം വരുത്തണം. അങ്ങനെ വരുമ്പോൾ അടുത്ത മാസത്തെ ആദ്യ പ്രവൃത്തി ദിനം വൈകുന്നേരം മുതൽ മാത്രമേ റേഷൻ വിതരണം നടത്താൻ പറ്റുള്ളൂ. ഇതേ തുടർന്നാണ് വ്യാപാരി സംഘടന മാസത്തിലെ ആദ്യ പ്രവർത്തി ദിനം അവധി വേണമെന്ന ആവശ്യവുമായി രംഗത്തെത്തിയത്. വ്യാപാരി സംഘടനയുടെ ആവശ്യം പരിഗണിച്ചാണ് അവധി നല്കാൻ തീരുമാനമായത്.
