കഴക്കൂട്ടം: കണിയാപുരം ജംഗ്ഷനിലെ ഗതാഗത കുരുക്കിനും തടസമായി നിൽക്കുന്ന പാഴ് മരങ്ങൾ മുറിച്ചുമാറ്റണമെന്ന് നാട്ടുകാർ ഒന്നടങ്കം ആവശ്യപ്പെടുന്നു. ഇതുവഴി വരുന്ന കെ.എസ്. കെ.എസ്. ആർ.സി ബസുകളടക്കമുള്ള വലിയ വാഹനങ്ങൾ റോഡിലേക്ക് ചാഞ്ഞുനിൽക്കുന്ന മരങ്ങളിൽ ഇടിക്കുന്നത് നിത്യസംഭവമാണ്.
മാത്രമല്ല എതിരെ വരുന്ന വാഹനങ്ങൾക്ക് കടന്നു പോകാൻ സൈഡ് കൊടുക്കാനും കഴിയില്ല. റെയിവേ ഗേറ്റിന് സമീപത്താണ് അപകടാവസ്ഥയിലായ രണ്ടു മരങ്ങൾ നിൽക്കുന്നത്. ദിവസവും അമ്പതിലധികം ട്രെയിനുകൾക്ക് കടന്നുപോകാൻ ഗേറ്റ് അടയ്ക്കുന്നതോടെ ചിറയിൻകീഴ്, പെരുമാതുറ ആലുംമൂട് ഭാഗത്ത് നിന്ന് വരുന്ന വാഹനങ്ങൾ ഇവിടെത്തെ കുരുക്കിൽപ്പെട്ട് അനങ്ങാൻ പറ്റാത്ത സ്ഥിതിയാണ്. കുരുക്കു മുറുകുന്നതോടെ ഗേറ്റ് തുറന്നാൽ പോലും വാഹനങ്ങൾക്ക് യഥാസമയം കടന്നുപോകാൻ പറ്റാത്തവരും.
മാത്രമല്ല വാഹനങ്ങളുടെ നീണ്ട നിര ആലൂംമൂട് ദേശീയപാത വരെ നീളുകയും ചെയ്യും. കുപ്പികഴുത്തുപോലുള്ള ജംഗ്ഷനിൽ ബസ് സ്റ്റോപ്പു കൂടി അതാത് ,സ്ഥലങ്ങളിലേക്ക് പോകുന്ന റോഡിലേക്ക് മാറ്റി സ്ഥാപിച്ചാൽ കുരുക്കഴിക്കാൻ കഴിയുമെന്നാണ് പ്രദേശവാസികളും യാത്രക്കാരും പറയുന്നത്. മരങ്ങൾ മുറിച്ച് ബസ് സ്റ്രോപ്പ് മാറ്റി സ്ഥാപിക്കുന്നതിന് കണിയാപുരം ഡവലെപ്പുമെന്റ് അസോസിയേഷന്റെ നേതൃത്വത്തിൽ അണ്ടൂർക്കോണം പഞ്ചായത്തിൽ നിവേദനം നൽകിയിട്ടുണ്ട്.
