പോത്തൻകോട്: വിദ്യാർത്ഥിനിയെ കെഎസ്ആർടിസി ബസിൽ വച്ച് പീഡിപ്പിക്കാൻ ശ്രമിച്ച പ്രതി പിടിയിൽ. വെള്ളനാട് സ്വദേശി രതീഷ് കുമാറാണ് (48) പിടിയിലായത്. പോത്തൻകോട് പോലീസാണ് പ്രതിയെ പിടികൂടിയത്. ഇയാൾ വെമ്പായം തേക്കടയിൽ വാടകയ്ക്ക് താമസിക്കുകയായിരുന്നു.
തിങ്കളാഴ്ച രാവിലെ ഒൻപതു മണിയോടെയാണ് സംഭവം നടന്നത്. നെടുമങ്ങാട് നിന്നും മുരുക്കുംപുഴയിലേക്ക് പോയ ബസിലാണ് സംഭവം നടന്നത്. ബസ് പോത്തൻകോട് ബസ് സ്റ്റോപ്പിൽ നിർത്തി 19 കാരി ഇറങ്ങുന്നതിനിടെയാണ് പ്രതി പീഡിപ്പിക്കാൻ ശ്രമിച്ചതെന്നാണ് പരാതിയിൽ പറയുന്നത്. മാത്രമല്ല വിദ്യാർഥിനിയെ ഇയ്യാൾ കടന്നുപിടിച്ചുവെന്നും പരാതിയിൽ പറയുന്നു.
തുടർന്ന് പ്രതി ബസിൽ നിന്ന് ഇറങ്ങി ഓടി. സംഭവത്തിനുശേഷം ഇയാൾ പോത്തൻകോട് മേലെമുക്ക് ഭാഗത്തേക്ക് കടന്നു കളഞ്ഞുവെന്നാണ് അറിഞ്ഞത്. ഇയാൾ പോത്തൻകോട് ജോലി ചെയ്തു വരികയായിരുന്നു.തുടർന്ന് ഉടൻതന്നെ പ്രദേശത്തെ നിരവധി സിസിടിവി ദൃശ്യങ്ങൾ പരിശോധിച്ച പോത്തൻകോട് പോലീസ് പ്രതിയെ തിരിച്ചറിയുകയായിരുന്നു.
തുടർന്ന് ഇന്ന് രാവിലെ പോത്തൻകോട് ജോലിക്ക് എത്തിയ പ്രതിയെ പോലീസ് അറസ്റ്റു ചെയ്തു. പ്രതിയെ പെൺകുട്ടി തിരിച്ചറിഞ്ഞു.ആറ്റിങ്ങൽ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
നെടുമങ്ങാട് ഡിവൈ എസ് പി ഗോപകുമാറിൻ്റെ നേതൃത്വത്തിൽ പോത്തൻകോട് എസ് എച്ച് ഒ രാജേന്ദ്രൻ നായർ,എസ് ഐ സായി സേനൻ, സി പി ഒ മാരായ വിനിഷ്, ഗോകുൽ, അരുൺ,അഖിൽ, ശ്രീലേഖ എന്നിവർ ചേർന്നാണ് പ്രതിയെ പിടികൂടിയത്.
