തിരുവനന്തപുരം: വർഷങ്ങളായി സെക്രട്ടേറിയറ്റിന് മുന്നിൽ സമരം ചെയ്യുന്ന ശ്രീജിത്തിനെതിരെ കേസെടുത്ത് പോലീസ്. തിരുവനന്തപുരം കൻ്റോൺമെന്റ് പൊലീസാണ് കേസെടുത്തത്. മുഖ്യമന്ത്രിയെ ചീത്ത വിളിച്ചതിനാണ് ശ്രീജിത്തിനെതിരെ കേസെടുത്തിരിക്കുന്നത്. മെഗാ ഫോണ്‍ ഉപയോഗിച്ച് അസഭ്യം പറയുകയായിരുന്നു.
സഹോദരന്റെ കസ്റ്റഡി മരണത്തിൽ നടപടി ആവശ്യപ്പെട്ട് വർഷങ്ങളായി സെക്രട്ടറിയേറ്റിനു മുൻപിൽ സമരം ചെയ്യുന്ന വ്യക്തിയാണ് ശ്രീജിത്ത്. കഴിഞ്ഞ ദിവസമാണ് കേസിനാസ്പദമായ സംഭവം നടന്നത്.
മുഖ്യമന്ത്രിയുടെ ഓഫീസ് സ്ഥിതി ചെയ്യുന്ന കെട്ടിടത്തിലേയ്ക്ക് നോക്കി മെഗാ ഫോണിലൂടെ മുഖ്യമന്ത്രിക്കെതിര അസഭ്യവർഷം നടത്തുകയായിരുന്നു. വഴിയാത്രക്കാരിൽ ഒരാൾ ഇത് ഫോണിൽ പകർത്തുകയും തുടർന്ന് സമൂഹമാധ്യമത്തിലൂടെ പ്രചരിക്കുകയുമായിരുന്നു. ഇത് ശ്രെദ്ധയിൽ പെട്ടതിനെ തുടർന്നാണ് പോലീസ് കേസ് രജിസ്റ്റർ ചെയ്തത്.
