കോട്ടയം: കോട്ടയം മെഡിക്കൽ കോളേജ് ആശുപത്രിയ്ക്ക് സമീപം തീപിടുത്തം. ആശുപത്രിയ്ക്ക് മുന്‍വശത്തുള്ള സ്വകാര്യ ബസ് സ്റ്റാൻഡിനോട് ചേര്‍ന്നുള്ള മൂന്ന് കടകൾക്കാണ് തീ പിടിച്ചത്. ഒരു ചെരുപ്പ് കട പൂർണ്ണമായും കത്തി നശിച്ചു.
അടച്ചിട്ടിരുന്ന ഒരു കടയിൽ നിന്നാണ് തീയും പുകയും ഉയർന്നത്. തുടർന്ന് സമീപത്തെ കടകളിലേക്കും തീ പടരുകയായിരുന്നു. കടയിൽ നിന്ന് തീയും പുകയും വരുന്നത് ശ്രദ്ധയിൽപെട്ട നാട്ടുകാർ ഉടൻ തന്നെ ഫയർ ഫോഴ്‌സിനെയും പോലീസിനെയും വിവരമറിയിച്ചു.
അഗ്നിരക്ഷാസേനയുടെ അഞ്ച് യൂണിറ്റുകളും, ഗാന്ധിനഗർ പോലീസും സ്ഥലത്തെത്തി തീ അണയ്ക്കാനുള്ള ശ്രമം നടക്കുകയാണ്. അപകടത്തിൽ ആളപായമില്ല. തീ പിടിയ്ക്കാനുള്ള കാരണം ഇതുവരെ വ്യക്തമല്ല.
